Akif Qədir oğlu İslamzadə “Şöhrət” ordeni ilə təltif edilib. Prezident İlham Əliyev bununla bağlı Sərəncam imzalayıb. Akif İslamzadə Azərbaycan musiqi mədəniyyətinin inkişafında xidmətlərinə görə “Şöhrət” ordeni ilə təltif olunub. Xatırladaq ki, avqustun 8-i A.İslamzadənin 75 yaşı tamam olub.
Həftənin VARİSİ
İrəvan xanının varisi Əmir Əli Sərdari İrəvani Diasporla İş üzrə Dövlət Komitəsinin dəvəti ilə Naxçıvanda olub. Səfərin ilk günündə Əmir Əli Sərdari İrəvani Naxçıvanın görməli yerləri ilə tanış olub: “Mənə bu fürsəti yaratdıqları üçün Komitəyə təşəkkür edirəm. Doğum günümə ən yaxşı hədiyyə Naxçıvanda, İrəvanın sərhədində Ağrı dağına baxmaq oldu. Mən əcdadlarıma yaxın olduğumu hiss etdim. Təsəvvür edə bilmirəm ki, bir vaxtlar əcdadlarım orada at çapıb, düşmənləri ilə vuruşublar. Burada olmaq gözəl hissdir”.
Həftənin QƏZASI
Yol-nəqliyyat hadisəsi zamanı ağır xəsarət alan bloqer Nicat Şakirlinin son vəziyyəti açıqlanıb. Tibbi Ərazi Bölmələrini İdarəetmə Birliyindən verilən məlumata görə, Kliniki Tibbi Mərkəzdə müalicəsi aparılan Nicat Şakirlinin vəziyyəti stabil ağır olaraq qiymətləndirilir. Hazırda həkim nəzarəti altındadır. Qəza zamanı xəsarət alan digər şəxs - Fəxri Rüstəmova Sabunçu Tibb Mərkəzində sağ əlin iki barmağının kəsilmiş yarası diaqnozu ilə ilkin tibbi yardım göstərilib, zəruri müayinələr aparılıb.
Həftənin HƏDİYYƏSİ
Şotlandiyada keçirilən dünya velosiped çempionatının mükafatlandırma mərasimində maraqlı anlar baş verib. Çempionatda 3 dəfə müxtəlif kateqoriyalarda qızıl medal qazanan qolsuz ispaniyalı para velosipedçi Rikardo Ten Argilesə qol saatı hədiyyə edilib. Hədiyyə edilən qol saatı markasının təşkilatın sponsoru olduğu öyrənilib. Baş verən hadisə sosial media izləyicilərinin də hiddətinə səbəb olub. Onlar bunu hörmətsizlik kimi qiymətləndiriblər.
Həftənin QAZANCI
"Barbie" filminin baş rol ifaçısı Margot Robbienin ekran işindən əldə edəcəyi qonorar açıqlanıb. Robbienin 50 milyon dollar qazanacağı bildirilir. Bu məbləğə aktrisanın çəkiliş zamanı aldığı maaş və kassa faizi daxildir. Həmçinin filmin rejissoru Qreta Qerviq də 1,18 milyard dollar gəlir əldə edəcək.
Həftənin REKORDU
Səudiyyə Ərəbistanının “Əl Nəsr” klubunun portuqaliyalı ulduz futbolçusu Kriştiano Ronaldo yeni rekorda imza atıb. Futbolçunun instaqram səhifəsindəki izləyicilərinin sayı 600 milyona çatıb. Belə ki, futbolçuya daha 100 milyon abunəçi qazanmaq üçün doqquz ay lazım olub.
