Moskvada hərbi məhkəmə İŞİD gəlinlərindən bəhs edən tamaşanın rus yazıçını və teatr rejissorunu “terrorizmi qanuniləşdirməkdə” təqsirli bilib, hər ikisini 6 il müddətinə azadlıqdan məhrum edib.
Hafta.az-ın yazdığına görə, Svetlana Petriçuk və Yevgeniya Berkoviç 2010-cu illərin ortalarında terrorçu silahlılarla evlənmək üçün Suriyaya gedən rusiyalı qadınlardan ilhamlanaraq “The Brave Falcon Finist” adlı oyun hazırladıqlarına görə məhkum ediliblər.
44 yaşlı Petriçuk və 39 yaşlı Berkoviç hökmdən apellyasiya şikayəti vermək niyyətindədirlər.
Bəziləri bağlı qapılar arxasında keçirilən məhkəmə prosesləri ölkədə sənət azadlığı ilə bağlı narahatlıqları artırıb.
Petriçuk və Berkoviç 7 ilə qədər həbs cəzası nəzərdə tutan terrorizmi qanuniləşdirmək ittihamı ilə məhkəməyə verilib və prokurorlar oyunun İŞİD-i müsbət şəkildə əks etdirdiyini müdafiə ediblər.
Sənətçilər ittihamları rədd ediblər. Berkoviç dinləmələrin birində tamaşanı terrorun qarşısını almaq üçün səhnələşdirdiyini deyib. Bu iddianı Petriyçuk da səsləndirib və o, tamaşada təsvir olunan hadisələrin qarşısını almaq üçün əsəri yazdığını bildirib.
Onun vəkilləri tamaşanın Rusiya Mədəniyyət Nazirliyi tərəfindən dəstəkləndiyini, hətta Rusiyanın ən nüfuzlu teatr mükafatı olan “Qızıl maska” mükafatına layiq görüldüyünü bildiriblər.
Vəkillərdən biri Kseniya Karpinskaya hökmü “tamamilə qanunsuz” və “ədalətsiz” adlandırıb və apellyasiya şikayəti verəcəklərini bildirib, lakin “ümidlərin az olduğunu” etiraf edib.
Petriyçukun vəkilinin sözlərinə görə, tamaşa 2019-cu ildə Sibirdəki qadın həbsxanasında məhbuslara oxunub və dövlət həbsxana xidməti öz saytında tamaşanı yüksək qiymətləndirib.
“Novaya qazeta”nın sənətçilərin həbsindən sonra onlara dəstək məqsədilə başlatdığı açıq məktubda artıq 16 mindən çox imza toplanıb.
Həbs cəzalarına əlavə olaraq, iki qadına azadlığa çıxdıqdan sonra üç il ərzində internet saytı idarə etmək yasaqlanıb. Onlar 2023-cü ilin may ayından həbsdədirlər və cəzalarını cəzaçəkmə müəssisəsində çəkəcəklər.
Rusiya hökumətinin 2022-ci ildə Ukraynaya hərbi təcavüzündən sonra sənət ictimaiyyətinə təzyiqlərini artırdığı deyilir.
