İnsan hüquqları üzrə QHT-nin bəyanatına görə, Kubada 2022-ci ilə qədər elektrik enerjisinin uzun müddət kəsilməsinə qarşı nümayiş keçirən 13 nəfər 15 ilə qədər həbs cəzasına məhkum edilib.
Hafta.az-ın AFP-yə istinadən yazdığına görə, mənzil-qərargahı ABŞ-ın Mayami şəhərində yerləşən “Justicia” təşkilatının siyahısına əsasən, itaətsizlik, təcavüz, düşmənçilik təbliğatı və təxribatda günahkar bilinən 13 məhbus - 10 kişi və 3 qadına 4 ildən 15 ilədək həbs cəzası verilib.
18 və 19 avqust 2022-ci il tarixlərində Havanadan təxminən 600 kilometr aralıda yerləşən Nuivetasda daha yaxşı yaşayış şəraiti və 18 saata qədər davam edən elektrik kəsilməsinə son qoyulması tələbi ilə nümayişlər keçirilib.
Mayamidə yerləşən “Cobalex” qeyri-hökumət təşkilatının məlumatına görə, müttəhimlər 2024-cü ilin yanvarında ağır polis və hərbi mühafizə altında Camaguey məhkəməsində mühakimə olunublar.
10 il həbs cəzası alan 23 yaşlı gəncin anası AFP ilə telefon danışığında adının çəkilməməsini istəyib və "Oğlumun vəziyyəti çox pisdir" deyib.
Səlahiyyətlilər bildiriblər ki, məhkumlar hökmdən apellyasiya şikayəti verə bilərlər.
Kubadakı elektrik böhranı 2022-ci ildə ən çətin dövrlərindən birini əks etdirir. O zaman bütün adada elektrik enerjisi kəsilmişdi. Nümayişçilərin həbs olunma riskinə və ağır cəzalara məruz qalmasına baxmayaraq, ölkədə hökumət əleyhinə nümayişlərin artması müşahidə olunur.
11 iyul 2021-ci ildə minlərlə kubalı "Biz acıq!" və "Diktaturaya ölüm!" şüarları səsləndirərək tarixi nümayişlərə qatılıb. Son rəsmi məlumatlara görə, yüzlərlə insan həbs edilib, 500-ə yaxın adam 25 ilədək həbs cəzasına məhkum olunub.
