İsveçrənin şimalındakı Şaffhauzen kantonunda ilk dəfə istifadəçinin intihar etməsinə imkan verən kapsul görünüşlü cihazdan istifadə edilib.
Hafta.az-ın yazdığına görə, hadisədən sonra polis 4 nəfəri saxlayıb, "intihara sövq etmək və kömək etmək" ittihamı ilə araşdırma başlayıb.
3D printerlə istehsal edilən və daha əvvəl heç istifadə olunmayan "Sarco" adlı intihar kapsulunun içində oturan şəxs düyməni basdıqda havaya azot qazı buraxır. Bu yolla oksigen səviyyəsi ölümcül səviyyəyə düşür və istifadəçi bir neçə dəqiqə ərzində huşunu itirərək ölür. Cihaz istifadəçinin öz istəyi ilə işə salınır və heç bir kənar müdaxilə tələb etmir.
“The Last Resort”un sözçüsü kapsuldan istifadə edən şəxsin immun sistemi ciddi şəkildə zəifləmiş 64 yaşlı amerikalı qadın olduğunu açıqlayıb. Qadının uzun müddət müalicə aldığı və həyat keyfiyyətinin ciddi şəkildə aşağı düşdüyü bildirilib. Sözçü qadının bütün psixiatrik müayinələrdən keçdiyini və qərarının tamamilə özünə aid olduğunu vurğulayıb. Bildirilib ki, ölən zaman onun yanında yalnız təşkilatın vitse-prezidenti Florian Villet olub.
Hadisədən sonra İsveçrə polisi hollandiyalı jurnalist Florian Uileti və iki isveçrəlini "intihara təhrik və kömək etmək" ittihamı ilə saxlayıb. Hollandiyanın “Volkskrant” qəzeti saxlanılan jurnalistin “Sarco” cihazının istifadəsini çəkmək istəyən bir fotoqraf olduğunu açıqlayıb. Polis rəsmiləri istintaqın davam etdiyini və cihazın hüquqi statusunun yoxlanıldığını bildiriblər.
İsveçrədə yerləşən “The Last Resort” təşkilatı “Ölüm insan haqqıdır” fikrini irəli sürərək, insanların öz həyatları ilə bağlı qərar vermək azadlığına malik olması lazım olduğunu müdafiə edir. "Məqsədimiz insanlara ləyaqətli şəkildə vidalaşmaq imkanı verməkdir" deyib təşkilatın sözçüsü. Uiletin amerikalı qadının ölümünün “dinc, tez və şərəfli şəkildə” baş verdiyini söyləməsi müzakirələri daha da qızışdırıb.
1990-cı illərdən bəri intiharla bağlı araşdırmaları ilə tanınan keçmiş avstraliyalı həkim Filip Nitsçke tərəfindən hazırlanan “Sarco” cihazının 3D printerlə istehsal oluna bilməsi cihazın nəzarətsiz şəkildə yayıla biləcəyi ilə bağlı narahatlıqları artırır. Mütəxəssislər cihazın uşaqlar və ruhi xəstələr tərəfindən istehsal oluna bilməsi riskini qeyd edirlər. Bu vəziyyət cəmiyyətdə ciddi etik və təhlükəsizlik narahatlığına səbəb olur.
Bu hadisə beynəlxalq aləmdə də geniş əks-səda doğurdu. Bir çox insan haqları təşkilatları və tibb orqanları intihar kapsulunun istifadəsi ilə bağlı narahatlıqlarını ifadə ediblər. Bəzi ekspertlər bu cür cihazların qadağan edilməli olduğunu iddia etsə də, digərləri evtanaziya və intihara yardımla bağlı hüquqi boşluqlara diqqət çəkib. Bildirilib ki, İsveçrə hökuməti cihazın istifadəsi ilə bağlı hüquqi tənzimləmə üzərində işləyir.
