Macarıstan, Rusiyanın Budapeştdəki səfiri Yevgeni Stanislavovu Macarıstan sərhədi yaxınlığındakı Ukraynanın Transkarpatiya bölgəsinə Rusiyanın dron hücumlarından sonra Xarici İşlər Nazirliyinə çağırdı.
Hafta.az yazır ki. Macarıstanın Baş naziri Peter Magyar, Rusiyanın Budapeştdəki səfiri Yevgeni Stanislavovun Macarıstan sərhədi yaxınlığındakı Ukraynanın Transkarpatiya bölgəsinə Rusiya ordusunun dron hücumlarından sonra Xarici İşlər Nazirliyinə çağırıldığını açıqlayıb.
Paytaxt Budapeştdə keçirilən mətbuat konfransında çıxış edən Baş nazir Magyar, hökumətin hücumu qətiyyətlə pislədiyini bildirərək, "Macarıstan hökuməti Rusiyanın Transkarpatiyaya hücumunu qətiyyətlə pisləyir" deyib.
Macarıstanın xarici işlər naziri Anita Orbanın cümə axşamı günü Rusiya səfiri ilə görüşəcəyi bildirilib. Yeni hökumətin ilk kabinet iclasından sonra keçirilən mətbuat konfransında Baş nazir Magyar bildirib ki, Orban hücumları pisləyəcək və Rusiyanın dörd ildən çoxdur davam edən Ukraynadakı müharibəyə nə vaxt son qoymağı planlaşdırdığını soruşacaq.
Xarici işlər naziri Orban sosial mediada yayımlanan videoda Macarıstanın Rusiyanın Ukraynanın qərbindəki etnik macarların yaşadığı ərazilərə pilotsuz təyyarə hücumlarını "dərin şəkildə pislədiyini" bildirib.
Ukrayna Prezidenti Volodimir Zelenski Rusiya səfirinin çağırılmasını "əhəmiyyətli mesaj" hesab edib. Rumıniyada keçirilən təhlükəsizlik iclasında çıxış edən Zelenski rəsmi sosial media hesabında bildirib ki, "Moskva bir daha təkcə Ukrayna üçün deyil, bütün qonşuları və Avropa üçün ciddi bir təhdid olduğunu göstərdi".
Macarıstanın keçmiş Baş naziri Viktor Orbanın hökuməti Rusiyanın 24 fevral 2022-ci ildə Ukraynaya qarşı başladığı hərtərəfli işğal və hücumlardan sonra belə Moskva ilə sıx münasibətlərini qoruyub saxlayıb.
14 may tarixində Rusiya gündüz saatlarında Ukraynaya genişmiqyaslı pilotsuz təyyarə hücumu həyata keçirib. Qərbi Ukraynadakı vacib infrastrukturu hədəf alan hücumlarda ən azı üç nəfər həlak oldu. Hücumlardan sonra NATO üzvü Polşa döyüş təyyarələrini havaya qaldırıb.
