j
İsrail ordusunun 2023-cü il oktyabrın 7-dən Qəzza zolağında başladığı hərbi əməliyyatlarda 193 jurnalist həlak olub.
Hafta.az-ın yazdığına görə, Fələstin Jurnalistlər Birliyi (PJS) təkcə 2024-cü ildə 91 media işçisinin, o cümlədən 23 qadın jurnalistin həlak olduğunu, 86-nın yaralandığını və bir çoxunun tibbi yardım ala bilmədiyi üçün öldüyünü müəyyən edib.
Jurnalistlərin əksəriyyəti hava hücumları, dronların zərbələri, artilleriya zərbələri və ya snayperlərin atəşi nəticəsində həlak olub. Təşkilat 148 jurnalistin güllələndiyini, 85 jurnalistin gözyaşardıcı qaza məruz qaldığını, 23 jurnalistin isə hərbi maşınlarla əzildiyini və ya əzilmək üzrə olduğunu müəyyən edib.
PJS-in hesabatında İsrail qüvvələrinin Qəzzada və işğal olunmuş ərazilərdə "mətbuatı qəsdən hədəfə aldığı" da vurğulanıb.
“Jurnalistlərə tez-tez birbaşa təhdid kimi yanaşılır və onları öldürmək üçün hədəfə alırdılar”, - hesabatda deyilir.
Dekabrda 5 jurnalistin ölümünə səbəb olan İsrail hava hücumu da daxil olmaqla, bir hücumda bir neçə jurnalistin öldürüldüyü hallar da olub.
Hesabatda həmçinin İsrailin Qəzzada jurnalist fəaliyyətini məhdudlaşdırmaq üçün istifadə etdiyi həbslər, təhdidlər, adam oğurluğu, kommunikasiya şəbəkələrini hədəf alaraq mətbuat fəaliyyətini pozmaq və sosial mediada Fələstin məzmununu sındırmaq kimi üsullar da ətraflı müzakirə edilib. Bildirilib ki, işğal altındakı İordan çayının qərb sahili və Qəzzada ən azı 64 jurnalist saxlanılıb, 15-i dindirilib, 27-si isə hərbi məhkəmələrdə mühakimə edilib.
İsrailin fələstinli jurnalistlərə qarşı müharibəsində jurnalistlərin ailələri də hədəfə alınıb. Evlərə endirilən hava zərbələri nəticəsində 164 jurnalistin yaxını həyatını itirib, 53 jurnalistin evi dağıdılıb.
