Rusiyanın regionları müharibədə könüllü iştirak üçün müqavilə imzalayanların sayını artırmaq məqsədilə mütəmadi səylər göstərir. Pul ödəmələri ilə yanaşı, bu yaxınlarda Krımda hərbi xidmətə getmək üçün müqavilə bağlayanlara pulsuz torpaq da verilməyə başlandı.
Hafta.az-ın yazdığına görə, Rusiya Müdafiə Nazirliyinin məlumatında deyilir ki, 2024-cü ilin birinci yarısında təxminən 190 min insan müharibəyə qoşulmaq üçün müqavilə imzalayıb. Bu rəqəm qismən səfərbərlik dövründə hərbi xidmətə çağırılan təxminən 302 min nəfərlə müqayisədə kifayət qədər yüksəkdir. Müqavilə ilə hərbi xidmətin könüllü olması və yüksək maaşla dəstəklənməsi ictimaiyyət arasında daha müsbət qarşılanır.
Əvvəlcə müharibə iştirakçılarına federal büdcədən aylıq ödəniş olaraq 195 min rubl veriləcəyi qərara alındı. Bununla belə, bəzi bölgələr bu ödənişlərə öz töhfələrini əlavə etməyə başlayıblar. Məsələn, Sankt-Peterburqda hərbi xidmətə gedənlər əməkhaqqı istisna olmaqla 2,1 milyon rubl birdəfəlik müavinət alırlarsa, Moskva vilayətində bu rəqəm 1,7 milyon rubl təşkil edir. Tatarıstan, Leninqrad vilayəti və Qaraçay-Çərkəzdə bu ödəniş 1,5 milyon rubla qədər yüksəlir. Digər bölgələrdə ödənişlər təxminən 1 milyon rubl təşkil edir.
Müharibədə iştirak edən hər kəsə (yaşayış yerindən asılı olmayaraq) 1,9 milyon rubl ödəməyə başlayan Moskva iyulda yeni addım atıb. Bütün digər ödənişlərlə birlikdə bu rəqəm ümumilikdə 2 milyon 145 min rubla çatır.
Moskvanın ardınca Krım da müharibəyə qoşulanlara torpaq təklif etməyə başladı. 2024-cü il sentyabrın 7-də qüvvəyə minəcək qanunla Krımda hərbi xidmət keçənlərə torpaq veriləcək. Bu torpaqların alınması üçün əvvəllər Krımda yaşamaq şərti tələb olunurdusa, indi bu şərt ləğv edilib.
Ekspertlərin fikrincə, hərbi xidmət üçün təklif olunan bu cəlbedici ödənişlərin mənfi tərəfləri də var. Bu stimullar mülki sektorda işçi qüvvəsinin itkisinə səbəb olur. 2024-cü ilə qədər müharibəyə gedənlərin sayı 600 mini keçib. Bu vəziyyət xüsusilə işçi qüvvəsi çatışmazlığı olan bölgələrdə ciddi problem yaradır.
Hazırda Rusiyada 2,5 milyon vakant vəzifə var və bir vəzifəyə kadr tapmaq üçün orta vaxt üç aya qədərdir. İşçilərin sayının azalması xüsusilə kənd yerlərində iqtisadi fəaliyyətə mənfi təsir göstərir.
