Pakistan ordusu “Pakistan Talibanı” döyüşçülərini “xaricilər” adlandırmağa başlayıb.
Hafta.az-ın yazdığına görə, Pakistan ordusunun media qanadı müntəzəm olaraq “Pakistan Talibanı”nı (TTP) və onun döyüşçülərini terrorçu və ya yaraqlı, bəzən isə quldurlar kimi təqdim edir.
Ötən aydan başlayaraq Pakistan ordusunun media qanadı TTP-ni, onun döyüşçülərini və yaraqlılarını təsvir etmək üçün “xarici fitnə” ifadəsini işlətməyə başlayıb. Bu vəziyyət Pakistanın hazırkı Baş Qərargah rəisi, general Asim Munir İslamabadda çıxışı zamanı “Pakistan Talibanı”nı “xaricilər” adlandırdıqdan sonra başlayıb.
Bu yaxınlarda hərbçilərin media qanadı TTP-yə “Xaricilər” adlı yeni terminlə damğa vurmağa başlayıb: “Əməliyyat zamanı qüvvələrimizlə “Xaricilər” arasında şiddətli toqquşma oldu. Nəticədə üç “Xarici” öldürülərək cəhənnəmə göndərildi, biri isə yaralanıb. Təhlükəsizlik qüvvələri, həmçinin orduya qarşı terror aktlarında iştirak edən və günahsız mülki əhalini hədəf alan ölü “Xaricilər”dən silah və sursat ələ keçirib. Hazırda ərazidə ola biləcək digər “Xaricilər”i məhv etmək üçün ərazi təmizlənir. Təhlükəsizlik qüvvələri ölkədəki xaricilər və terror təhlükəsini aradan qaldırmaqda qərarlıdır”.
“Xariclər”, İslamın ilk dövrlərində dördüncü xəlifə Əli ibn Əbu Talibə qarşı qiyam qaldırdıqları zaman İslamın ilk vətəndaş müharibəsi ilə müsəlmanların əsas tərkibindən qopan bir məzhəb olaraq təyin olunur.
“Taliban”a gəlincə, hüquqi baxımdan, bu, Britaniya Hindistanında yaranmış və “Dübandi hərəkatı” adlanan islahat hərəkatının bir hissəsidir (onun məqsədi İslamı bütün qeyri-islami inanc və əməllərdən təmizləməkdir).
“Dübandi hərəkatı” çox vaxt əsas sünni hərəkatı kimi səciyyələnir və onun ardıcıllarının əksəriyyəti Hənəfi məzhəbinin ardıcıllarıdır. Bunun əksinə olaraq, “Xariclər” dörd əsas sünni fiqh məktəbinin heç birinə tabe olmayıblar. Teoloji baxımdan “Pakistan Talibanı” (TTP) tamamilə əsas sünni İslamına riayət edir.
Bununla belə, TTP-nin son iyirmi ildə özünü islami güc və ya regionda islam maraqlarının təmsilçisi kimi görən Pakistan ordusu ilə müharibədə olması onu Cənubi və Cənub-Qərbi Asiyada əsas İslam maraqlarından siyasi baxımdan uzaqlaşdırıb.
Pakistan ordusu Əfqanıstanda “Sovet İttifaqının kafir hərbi qüvvələrinə” qarşı cihadı dəstəkləmək, habelə Hindistanın işğalı altında olan Kəşmirdə “kafir Hindistan işğalçı qüvvələri”nə qarşı Kəşmir müsəlmanlarını dəstəkləməkdə öz rolu və irsi ilə fəxr edir.
11 sentyabr hadisəsindən sonra ilk dəfə olaraq Pakistan ordusu yaraqlı qüvvələr olan TTP ilə vuruşmalı olub.
TTP gücünü təkcə konseptuallaşdırılmış inancdan deyil, həm də regionda qeyri-islami ünsürlərə qarşı mübarizə aparan İslami qüvvə kimi öz imicindən alır.
Pakistan Talibanının imicini onların islamçı ideologiyaya sadiq olan “Əl-Qaida” kimi beynəlxalq terror qruplaşmaları ilə əlaqələri də gücləndirib. Belə bir vəziyyətdə Cənubi Asiyada TTP-nin İslam strukturundan çıxarılması Pakistan ordusu üçün bir zərurətə çevrilib.
Pakistan ordusu pakistanlı din alimlərinin TTP və ya Üsamə bin Ladeni İslam şəhidi kimi qələmə vermək cəhdlərinə sərt reaksiya verib, çünki bu cür cəhdlər ordunun regionda əsl İslam qüvvəsi kimi mövqelərini sarsıdıb.
TTP isə Pakistan dövlətinə və ordusuna qarşı apardıqları mübarizəni “cihad” olaraq təyin edir. O, hətta bu münaqişəni “Qəzvətı Hind” kimi təsvir edən bir ifadə də uydurub.
