Azərbaycan prezidenti İlham Əliyev Türkmən Xalq Maslahatının sədri Qurbanqulu Berdiməhəmmədova məktub göndərib.
Hafta.az-ın Turkmenportal-a istinadən yazdığına görə, Azərbaycan dövlət başçısı Qurbanqulu Berdiməhəmmədova bu il dekabrın 12-də Aşqabadda keçiriləcək Beynəlxalq Sülh və Etimad İli Forumunda iştiraka dəvətə görə təşəkkür edib.
“BMT Baş Assambleyası tərəfindən 2025-ci ilin Türkmənistanın təşəbbüsü ilə “Beynəlxalq Sülh və Etimad İli” elan edilməsi ölkənizin beynəlxalq sülh və təhlükəsizliyin möhkəmləndirilməsinə verdiyi töhfənin beynəlxalq ictimaiyyət tərəfindən yüksək qiymətləndirilməsinin sübutudur”, - Əliyev məktubda qeyd edib.
Azərbaycan prezidenti tədbirin Türkmənistanın neytrallığının 30 illiyinə həsr olunmasının rəmzi olduğunu vurğulayıb. Onun sözlərinə görə, bu statusun beynəlxalq ictimaiyyət tərəfindən tanınması Türkmənistanın dünya miqyasında nüfuzunu artıran mühüm tarixi nailiyyətə çevrilib.
Prezident Əliyev xatırladıb ki, Azərbaycan qardaş ölkə kimi Türkmənistanın neytrallıq statusuna həmişə hörmətlə yanaşır və BMT Baş Assambleyasının 1995-ci və 2015-ci il tarixli müvafiq qətnamələrinin həmmüəllifi kimi çıxış edir.
Azərbaycan prezidenti qarşıdan gələn forumun qlobal sülhün və sabitliyin möhkəmləndirilməsinə, eləcə də BMT-nin məqsədlərinin həyata keçirilməsinə mühüm töhfə verəcəyinə əminliyini ifadə edib.
İlham Əliyev Qurbanqulu Berdiməhəmmədova möhkəm cansağlığı və fəaliyyətində uğurlar, qardaş Türkmənistan xalqına sülh və firavanlıq arzulayıb.
