Rusiyada iqtisadçılar 2025-ci il üçün iqtisadi durğunluq və yüksək inflyasiya (staqflyasiya) riskinin artdığını qeyd edirlər.
Hafta.az-ın RBC-ya istinadən yazdığına görə, Rusiyada həm yüksək inflyasiyanın, həm də yüksək faizlərin uzun müddət davam etdiyi “Türkiyə ssenarisi” adlı iqtisadi modelin baş verməsinin qarşısı alınmalı olduğu bildirilir. Analitiklər bildirirlər ki, Rusiya Mərkəzi Bankı belə bir ssenarinin qarşısını almaq üçün sərt pul siyasəti həyata keçirir.
Rusiyada 2025-ci il üçün staqflyasiya proqnozu hazırda əsas ssenari olmasa da, son aylarda risklərin artdığı bildirilir. Ekspertlər bildirirlər ki, belə bir ssenarinin qarşısını almaq üçün Mərkəzi Bank iqtisadi artımı çox yüksək faizlə ləngitmək və ya aşağı faizlə inflyasiyaya nəzarət edə bilməmək arasında tarazlıq yaratmalıdır. Hazırda illik inflyasiya 8,78 faiz, faiz dərəcəsi isə 21 faizə çatıb.
“Türkiyə ssenarisi” yüksək faiz dərəcələrinə və iqtisadi tarazlığın davam etməsinə baxmayaraq inflyasiyanın azaldılması mümkün olmayan bir vəziyyətə işarə edir. Türkiyədə inflyasiyanın 50 faizdən yuxarı olması bu ssenarinin ən parlaq nümunəsi hesab olunur. Lakin Rusiya iqtisadiyyatında dollarlaşma və mənfi faiz dərəcələri kimi Türkiyəyə xas bəzi xüsusiyyətlər olmadığından bu ssenarinin tam reallaşma ehtimalı az görünür.
İqtisadçıların fikrincə, Rusiyada staqflyasiya riski hələ də aşağıdır. Bununla belə, iqtisadi artımın yavaşlaması və faiz dərəcələrinin təsirinin zamanla daha aydın hiss olunacağı gözlənilir. Ekspertlər dövlət xərclərini azaltmağı və iqtisadi artımı mövcud imkanlara uyğun səviyyədə saxlamağı tövsiyə edirlər. Xüsusilə müdafiə sənayesi kimi dar bir sektorda ağır dövlət xərclərinin iqtisadiyyatda balanssızlığa səbəb ola biləcəyi ilə bağlı xəbərdarlıqlar edilir.
Rusiya Mərkəzi Bankının həyata keçirdiyi sərt pul siyasəti iqtisadiyyatı “Türkiyə ssenarisi”ndən uzaq tutmaq cəhdi kimi qiymətləndirilir. Bununla belə, bu vəziyyətin uzunmüddətli perspektivdə, xüsusilə də beynəlxalq sanksiyaların təsirinin davam etdiyi bir mühitdə iqtisadi artıma necə təsir edəcəyi qaranlıq olaraq qalır.
