Çin, Səudiyyə Ərəbistanı, Özbəkistan, Monqolustan və digər ölkələrdən təxminən 50 elmi tədqiqatçı, mütəxəssis və alim bu yaxınlarda Çinin Sincan Uyğur Muxtar Vilayətinin paytaxtı Urumçidə "Bir kəmər, bir yol" Təşəbbüsü çərçivəsində Səhralaşmanın Qarşısının Alınması və Nəzarəti üzrə Beynəlxalq Simpoziumda iştirak etmək üçün toplaşıblar.
Hafta.az-ın yazdığına görə, onlar təcrübə mübadiləsi aparıb və bu sahədə əməkdaşlığın genişləndirilməsini müzakirə ediblər.
Səhralaşma insanların yaşamasına və davamlı inkişafına təsir edən ciddi qlobal ekoloji problemdir. "Bir kəmər, bir yol" Elmi Təşkilatlar Alyansı (ANSO) Katibliyinin direktor müavini Yi Zhijun qeyd edib ki, səhralaşma ətraf mühit, iqtisadiyyat və insan rifahı ilə bağlıdır və fənlərarası perspektivdən həll edilməlidir. O, bunun beynəlxalq mübadilə və əməkdaşlıqdan ayrılmaz olduğunu və bütün tərəflərin birlikdə çalışmalı olduğunu vurğulayıb.
Simpozium iştirakçıları səhralaşmanın qarşısının alınması və ona qarşı mübarizə sahəsində elmi bilikləri və praktik təcrübələri bölüşüblər. Çin Elmlər Akademiyasının (ÇAK) Sincan Ekologiya və Coğrafiya İnstitutunun direktor müavini Duan Veyli səhralaşma ilə mübarizədə institutun Monqolustan və Qazaxıstanla əməkdaşlığından danışıb.
"Dünyanın hər yerində daha çox tədqiqat institutu ilə sıx tərəfdaşlıq qurmağı və birgə laboratoriyalar yaratmaq, sahə müşahidə şəbəkələrini paylaşmaq və gənc elmi və texnoloji istedadları yetişdirməklə bütün tərəflərə davamlı inkişafa nail olmaqda kömək etməyi səbirsizliklə gözləyirik", - deyə Duan Veyli bildirib.
Simpoziumda "Bir kəmər, bir yol” təşəbbüsü çərçivəsində səhralaşmanın qarşısının alınması və mübarizəsinə dair Elmi Hesabat" müzakirə olunub. Region ölkələrində səhralaşma ilə mübarizədə mövcud çətinliklər qeyd olunub, beynəlxalq ictimaiyyət tərəfindən geniş şəkildə başa düşülə və qəbul edilə bilən bir sıra elmi əsaslı idarəetmə modelləri, bilik sistemləri hazırlamaq məqsədilə müxtəlif idarəetmə proqramlarının tətbiqi və effektivliyi qiymətləndirilib.
Hazırkı simpozium Çin Elmlər Akademiyasının Sincan Ekologiya və Coğrafiya İnstitutu və "Bir Kəmər, Bir Yol" Beynəlxalq Elmi Təşkilatlar Alyansı tərəfindən təşkil olunub.
-1780681336.jpg&h=173&w=263&zc=1&q=80)
