Qərb ictimai rəyində İranın Ukraynanın işğalına dəstək olaraq Rusiyaya silah satdığı iddia olunurdu. Təhlükəsizlik mənbəsi bildirib ki, onlar silah müqaviləsinə istinad edərək, İranın Ukraynada gedən müharibə üçün Rusiyaya sursat satdığına dair ilk konkret sübutu təqdim edib.
Hafta.az-ın “Sky News”a istinadən yazdığına görə, 14 sentyabr 2022-ci il tarixli 16 səhifəlik sənəddə dəyəri 1 milyon dollardan bir qədər çox olan müxtəlif ölçülü artilleriya və tank mərmiləri və raket nümunələri var.
İranın digər ölkələrlə bağladığı müqavilələrdə olduğu kimi ingilis dilində yazılmış sursatların çatdırılması üçün müqavilənin İran Silahlı Qüvvələrinin Müdafiə və Maddi-Texniki Təchizat Nazirliyi ilə Rusiyanın dövlət hərbi ixrac və idxal şirkəti “Rosoboroneksport” arasında imzalandığı iddia edilir. “Bizim qiymətləndirməmizə əsasən, bunlar Rusiyaya göndərilən digər silahların nümunələridir”, - deyə təhlükəsizlik mənbəsi bildirib.
Müqavilənin həqiqiliyini yoxlamaq mümkün olmasa da, “Sky News” də faylı bir sıra ekspertlərə yönləndirib. Mütəxəssislər, sənədin məzmununun "ağlabatan" olduğunu və 14 sentyabr 2022-ci ildə baş verdiyi iddia edilən belə bir əməliyyatla bağlı ayrıca hesabata uyğun gəldiyini söyləyib.
Ukraynadakı müharibəni yaxından izləyən, eyni zamanda İran üzrə ekspert olan Kral Birləşmiş Xidmətlər İnstitutunun baş elmi işçisi Cek Uotlinq vurğulayıb ki, Moskva ilə Tehranın silah və sursatla bağlı müqavilələri birlikdə imzalaması “ağıllı və məntiqli” olardı.
“Sky News” sənədləri may ayında Böyük Britaniyaya səfər edən Ukraynanın Baş naziri Denis Şmihala və Böyük Britaniyanın xarici işlər naziri Ceyms Kleverliyə göstərib. Kiyev və London müqavilənin etibarlılığını araşdırmağı planlaşdırdıqlarını və etibarlılığı sübut olunarsa, tədbir görəcəklərini bildiriblər.
C.Kleverlinin sözlərinə görə, İran rejimi Rusiyaya Ukrayna şəhərlərini vurmaq üçün hücum təyyarələri verdikdən sonra İngiltərə Tehrana qarşı sanksiyalar tətbiq edib: “Biz İranın Ukraynanı işğal etmək cəhdində Rusiyaya hərbi dəstək verdiyinə dair sübutlarımız olduqda hərəkətə keçdik və təbii ki, biz həmişə eyni şeyi edəcəyik”.
“Sky News” daha əvvəl də İranın yanvar ayında Xəzər dənizindəki yük gəmiləri vasitəsilə Rusiyaya külli miqdarda pilotsuz təyyarələr, mərmi və döyüş sursatları verməsi ilə bağlı iddialar barədə məlumat vermişdi.
