Azərbaycanın Türkiyədəki səfirliyi və bu diplomatik nümayəndəliyimizin nəzdində Silahlı Qüvvələrin Hərbi Attaşelik Aparatı 8 Noyabr – Zəfər Günü münasibətilə Ankara şəhərində rəsmi qəbul təşkil edib.
Hafta.az xəbər verir ki, Quru Qoşunları Məktəbində keçirilən mərasimdə şəhid ailələri və qazilər, rəsmi şəxslər, millət vəkilləri, Türkiyə Silahlı Qüvvələrinin vəzifəli şəxsləri, qardaş ölkə ictimaiyyətinin görkəmli nümayəndələri iştirak ediblər.
Əvvəlcə şəhidlərimizin əziz xatirəsi bir dəqiqəlik sükutla yad edilib.
Sonra Azərbaycan və Türkiyənin dövlət himnləri səsləndirilib.
Türkiyənin müdafiə naziri Hulusi Akar, Azərbaycanın Türkiyədəki səfiri Rəşad Məmmədov və Milli Məclisin Azərbaycan-Türkiyə parlamentlərarası işçi qrupunun rəhbəri, akademik Əhliman Əmiraslanov çıxışlarında Müzəffər Ali Baş Komandan İlham Əliyevin rəhbərliyi ilə qəhrəman Azərbaycan Ordusunun 44 günlük Vətən Savaşında qazandığı parlaq Qələbənin real nəticələrindən, Azərbaycan-Türkiyə qardaşlıq münasibətlərindən, dövlətlərimizin regionda sülh, sabitlik və inkişaf mühiti yaratmaq istiqamətində göstərdikləri səylərdən danışıblar.
