Bu ilin yanvar-iyun aylarında Azərbaycanda dəmir yolu nəqliyyatı vasitəsi ilə 1,745 milyard ABŞ dolları dəyərində 3,538 milyon ton yük daşınıb.
Hafta.az xəbər verir ki, bu barədə Dövlət Gömrük Komitəsinin məlumatında bildirilib.
Məlumata görə, bu göstərici 2025-ci ilin eyni dövrü ilə müqayisədə dəyər ifadəsində 232,2 milyon ABŞ dolları və ya 15, 3% çox, həcm ifadəsində isə 9,136 min ton və ya 0,3 % azdır.
Hesabat dövründə Azərbaycandan dəmir yolu nəqliyyatı ilə 634 milyon ABŞ dolları dəyərində təqribən 1,343 milyon ton yük ixrac olunub ki, bu, əvvəlki ilin eyni dövründəki göstərici ilə müqayisədə dəyər ifadəsində 219,7 milyon ABŞ dolları və ya 53 %, həcm ifadəsində isə 5,6 min ton və ya 0,4 % çoxdur.
Bu ilin yanvar-iyun aylarında Azərbaycana dəmir yolu nəqliyyatı ilə 1,111 milyard ABŞ dolları dəyərində 2,195 milyon ton yük idxal olunub ki, bu göstərici 2025-ci ilin eyni dövrü ilə müqayisədə dəyər ifadəsində 12,5 milyon ABŞ dolları və ya 1,1 % çox, həcm ifadəsində isə 14,8 min ton və ya 0,7 % azdır.
Qeyd edək ki, 2026-cı ilin yanvar-iyun aylarında Azərbaycanda nəqliyyat vasitələri ilə ümumilikdə 24,661 milyard ABŞ dolları dəyərində 26,450 milyon ton yük daşınıb. Bu, əvvəlki ilin eyni dövrü ilə müqayisədə dəyər baxımından 261 milyon ABŞ dolları və ya 1,1 % çox, həcm baxımından isə 2,8 milyon ton və ya 9,6 % azdır.
Hesabat dövründə yüklərin daşınma vasitələri üzrə Azərbaycandan ümumilikdə 16,320 milyard ABŞ dolları dəyərində 22,033 milyon ton yük ixrac edilib ki, bu da illik müqayisədə dəyər baxımından 3,4 milyard ABŞ dolları və ya 26,7 % artım, həcm ifadəsində isə 1,9 milyon ton və ya 7,8 % azalma deməkdir.
Eyni zamanda bu ilin yanvar-iyun aylarında yüklərin daşınma vasitələri üzrə Azərbaycana ümumilikdə 8,341 milyard ABŞ dolları dəyərində 4,416 milyon ton yük idxal edilib. Bu isə 2025-ci ilin eyni dövründəki göstəriciyə nisbətən dəyər ifadəsində 3,2 milyard ABŞ dolları və ya 27,6 %, həcm baxımıdan isə 941 min ton və ya 17,6 % azdır.
Ümumilikdə, Azərbaycan son illərdə Avrasiya məkanında əsas tranzit-logistika mərkəzlərindən birinə çevrilməsi istiqamətində iri infrastruktur layihələrini davam etdirir. Ölkə Şərq-Qərb, Şimal-Cənub və Orta Dəhliz üzrə yükdaşımaların artırılması məqsədilə dəmir yolu, avtomobil yolları, dəniz limanları və logistika infrastrukturuna milyardlarla dollar həcmində investisiyalar yatırıb. Bu siyasətin əsas hədəfi Azərbaycanın Avropa ilə Asiya arasında etibarlı tranzit qovşağı kimi mövqeyini daha da gücləndirməkdir.
Xüsusilə Orta Dəhlizin inkişafı dövlətin prioritet istiqamətlərindən biridir. Bakı Beynəlxalq Dəniz Ticarət Limanı, Bakı-Tbilisi-Qars dəmir yolu, Ələt Azad İqtisadi Zonası və yeni logistika mərkəzləri bu marşrutun rəqabət qabiliyyətini əhəmiyyətli dərəcədə artırır. Hazırda Bakı Limanının yükötürmə qabiliyyətinin 15 milyon tondan 25 milyon tona, konteyner emalı imkanlarının isə 500 min TEU-dan 1 milyon TEU-ya çatdırılması istiqamətində genişləndirmə işləri aparılır.
