“Bu il ilk dəfə olaraq ASAN xidmət xətti ilə Qərbi Azərbaycandan olan şəxslərə şəxsiyyət vəsiqəsi verilərkən onların doğulduğu ərazilər öz adları ilə göstərilir”. Bu fikirləri Qərbi Azərbaycan İcması İdarə Heyətinin sədri, deputat Əziz Ələkbərli bildirib. “Bu, bizim atdığımız addımlardan biridir. Qarşıda da beynəlxalq hüquq normalarına uyğun olaraq ciddi addımlar atacağıq”, – Ə.Ələkbərli qeyd edib.
Həftənin KEÇİDİ
Türkiyə Cümhuriyyətinin 100-cü ildönümünü münasibətilə İstanbul Boğazında parad keçirilib. Türkiyə Prezidenti Rəcəb Tayyib Ərdoğan Boğazda keçirilən bu mərasimi Vahdettin Köşkündən izləyib. Mərasimə 7 mindən çox şəxsi heyət qatılıb. Hərbi gəmiləri havadan 14 döyüş təyyarəsi müşayiət edib. Keçidə 100 gəmi qatılıb. Parad zamanı həmçinin 101 top atışı olub. Bu, Türkiyə Dəniz Qüvvələri tarixində ən böyük parad hesab olunur.
Həftənin PSİXOLOQU
“Emosional ehtiyacı ödənməyən qadının boşanmaq kimi bir hüququ var”. Bu fikirləri ARB telekanalında yayımlanan “Günə son” proqramında qonaq olan psixoloq Əfsanə Rüstəmova səsləndirib. Onun proqramda səsləndirdiyi fikirlər müzakirələrə səbəb olub: “Əgər mənim 3000 manatlıq telefon kimi emosional ehtiyacım varsa, ya həyat yoldaşım onu almalıdır, ya da boşanmaq kimi şansım var. Şillə dəyəndən sonra hər şey üçün gecdir. Sizin şəxsiyyətinizə xələl gələndən sonra şuba da geyinsəniz, 3 yox, 5 minlik telefon da işlətsəniz də, qırılmış şəxsiyyətinizi bərpa edə bilməyəcəksiniz”.
Həftənin QADAĞASI
İspaniya Kral Futbol Federasiyasının (RSFF) prezidenti Luis Rubiales üç il müddətinə milli və beynəlxalq səviyyədə futbolla bağlı bütün fəaliyyətlərdən uzaqlaşdırılıb. Bu barədə FİFA qərar qəbul edib. Ali futbol qurumunun İntizam Komitəsi L.Rubialesin FİFA-nın qoyduğu qaydaları pozduğu üçün bu qənaətə gəlib. Qeyd edək ki, İspaniya yığması “DÇ-2023”ün finalında İngiltərəni 1:0 hesabı ilə məğlub edərək dünya çempionu olub. Luis Rubiales mükafatlandırma mərasimində İspaniya millisinin üzvü Cennifer Ermosonu öpüb.
Həftənin MALİKANƏSİ
Ukrayna Prezidenti Volodimir Zelenskinin həyat yoldaşı Yelena Zelenskayaya məxsus malikanə açıq hərracda 44,3 (810, 000 AZN) milyon rubla satılıb. Bu barədə “İzvestiya” məlumat yayıb. Bildirilib ki, ev Yaltanın Livadiya qəsəbəsində yerləşir. Qeyd edək ki, Krım Dövlət Şurasının spikeri Vladimir Konstantinov 2022-ci il martın sonunda Zelenskilər ailəsinin Yaltadakı mənzilinin Krımda özəlləşdirilməli olan əmlaklar siyahısına daxil edildiyini açıqlayıb. Daha sonra 24 may 2023-cü ildə milliləşdirilib və oktyabrın 7-də hərraca çıxarılıb.
Həftənin QƏTLİ
İsrail XİN HƏMAS-ın oktyabrın 7-si ölkəyə hücumu zamanı qruplaşma üzvləri tərəfindən qaçırılan 22 yaşlı alman Shani Loukun həlak olduğunu açıqlayıb. Bu barədə məlumatı İsrail XİN “X” hesabında paylaşıb. “Təəssüf hissi ilə bildiririk ki, Almaniya və İsrail vətəndaşlığı olan Shani Loukun cəsədi tapılıb və şəxsiyyəti müəyyən edilib. Shani musiqi festivalından qaçırılıb, işgəncələrə məruz qalıb və ağlasığmaz dəhşətlər yaşayıb”, - deyə məlumatda qeyd olunub.
