“AzerGold” Qapalı Səhmdar Cəmiyyətinin (QSC) 2020-ci ilin yekunlarına dair maliyyə hesabatları dərc edilib.
Hafta.az-ın yazdığına görə, dünyanın tanınmış audit şirkətlərindən olan “PricewaterhouseCoopers” (PwC) tərəfindən aparılan maliyyə yoxlamalarına əsasən, əvvəlki illə müqayisədə 2020-ci ildə Səhmdar Cəmiyyətin qızıl hasilatında 8,7 faiz, gümüş hasilatında isə 17,6 faiz artım qeydə alınıb. Hesabat ilində qızıl və gümüşün beynəlxalq birjalarda satışından ölkə iqtisadiyyatına 110,2 milyon dollar həcmində vəsait cəlb edilib ki, bu da 2019-cu illə müqayisədə 27,9 faiz (24,04 milyon dollar) çoxdur.
Bununla yanaşı, Səhmdar Cəmiyyətin ümumi mənfəəti, mənfəət marjası, xalis mənfəəti, eləcə də EBITDA (faiz, vergi və amortizasiya xərcləri çıxılmazdan əvvəlki əməliyyat mənfəəti) artıb. Belə ki, Cəmiyyətin ümumi mənfəəti 2019-cu illə müqayisədə 43,04 milyon dollar və ya 141,3 faiz artaraq 2020-ci ildə 73,5 milyon dollardan çox olub. Ümumi mənfəətin satışdan gəlirlərə olan nisbəti ilə hesablanan ümumi mənfəət marjası 2019-cu ildə 35 idisə, 2020-ci ildə 66,7 təşkil edib. Cəmiyyətin xalis mənfəəti isə 2019-cu illə müqayisədə təqribən 35,8 milyon dollar (287,3 faiz) artaraq 2020-ci ildə 48,2 milyon dollardan çox olub. “AzerGold” QSC 2019-cu ili təqribən 43,9 milyon dollar EBITDA ilə başa vurmuşdusa, 2020-ci ildə bu göstərici 57,6 faiz artaraq 69 milyonu ötüb.
Maliyyə hesabatlarına əsasən, aktivlərin səmərəli şəkildə idarə olunması nəticəsində müəssisə mövcud resurslardan optimal səviyyədə mənfəət əldə edib. Belə ki, aktivlərin gəlirlilik indikatoru (ROA - Return on Assets) ötən il artaraq 34,5 faiz təşkil edib. Müqayisə üçün bildirək ki, bu indeks üzrə göstərici 2019-cu ildə 11 faiz olub.
“AzerGold” QSC-nin ümumi kapitalı 2019-cu ildə 27,57 milyon dollar olduğu halda, 2020-ci ildə bu göstərici 70,56 milyon dollar (255,9 faiz) artaraq 98 milyon dollardan çox olub. Ümumi kapitalın artması cari ilin xalis mənfəəti hesabına, həmçinin dövlət tərəfindən nizamnamə kapitalının artırılmasına (38 milyon manat həcmində) əsaslanır. 2020-ci ilin sonuna “AzerGold” QSC-nin səhm kapitalı 29,5 milyon dolları ötüb.
Hesabat ilində 29,6 milyon manat məbləğində xalis mənfəət Cəmiyyət tərəfindən investisiya fəaliyyəti üzrə istifadə olunub. Qeyd edək ki, qızıl layihələrinin icrası məqsədilə kapital qoyuluşunu öz hesabına təmin edən QSC bu istiqamət üzrə dövlət büdcəsindən asılılığı tamamilə aradan qaldırıb. Dövlət büdcəsi hesabına maliyyələşmə yalnız yeni fəaliyyət sahəsi olan dəmir filizi layihələrinin icrası məqsədilə həyata keçirilir.
Xatırladaq ki, Azərbaycan Respublikası Prezidentinin 1 sentyabr 2020-ci il tarixli Sərəncamı ilə “AzerGold” QSC-yə ölkə ərazisində qara metal filizi yataqlarının öyrənilməsi, tədqiqi, kəşfiyyatı, işlənilməsi və idarə olunması, habelə bu sahənin inkişafına dair digər işlərlə bağlı səlahiyyətlər verlib. Sərəncamdan irəli gələn tapşırıqların icrası, dəmir filizi yataqları üzrə fəaliyyətin təşkili ilə əlaqədar səhmləri “AzerGold” QSC-yə məxsus olan ilk törəmə şirkət - “Daşkəsən Dəmir Filiz” Məhdud Məsuliyyətli Cəmiyyəti (MMC) ötən ildən dövlət qeydiyyatına alınaraq fəaliyyətə başlayıb. Dövlət başçısının 6 avqust 2020-ci il tarixli
Sərəncamına əsasən, MMC tərəfindən Daşkəsən dəmir filizi yataqlarının istismara verilməsi ilə bağlı kompleks işlərin icrası davam etdirilir.
Maliyyə hesabatı və digər göstəriciləri üzrə ətraflı məlumatı “AzerGold” QSC-nin rəsmi saytından (https://azergold.az/haqqimizda/maliyye-ve-audit-hesabatlari) əldə etmək olar.
