Qahirədə keçiriləcək beynəlxalq konfransda “sosial medianın dini diskursa təsiri” müzakirə olunacaq. Konfrans 9-10 sentyabr tarixlərində “Kiber Məkan və Dini Söhbətin Müasir Alətləri” adı altında keçiriləcək.
Hafta.az-ın yazdığına görə, Misirin vəqflər naziri Məhəmməd Muxtar Cuma deyib ki, konfrans maarifləndirici mühit yaradacaq və diqqəti kiberməkanda birgə işə cəlb edəcək. “Biz Vəqflər Nazirliyinin son illərdə mübarizə apardığı münaqişələrdən heç də az əhəmiyyətli və ya asan olmayan yeni qarşıdurma ilə üzləşirik. Əvvəlki problem məscidlərin radikal qruplardan azad edilməsi idi”, - o deyib.
Misir hökuməti bundan əvvəl məscidlərin minbərlərinə nəzarəti gücləndirmək üçün tədbirlər görərək, məscidlərdə xütbə və mühazirələrin yalnız əzhərlərdə oxunmasını məhdudlaşdıran qanun qəbul etmişdi. Cümə xütbəsi bütün məscidlərdə minbərlərə nəzarət məqsədilə standartlaşdırılıb, həmçinin qanunu pozanlara həbs və cərimələr kəsilib.
Vəqflər naziri dünən nazirlik yanında İslam İşləri Ali Şurasının “Nəşr Komitəsi” ilə görüşündə İslam İşləri Ali Şurasının 34-cü beynəlxalq konfransına hazırlıq işlərini nəzərdən keçirib. Məlumata görə, nazir Cuma, "Prezident Sisinin konfransa himayədarlıq etməsinin beynəlxalq səviyyədə mötədil düşüncəyə böyük dəstək olduğunu" ifadə edərək, "Süni intellekt zərurətdir və hər şeydə istifadə edilməlidir" deyib.
Konfransda “kiber məkan dövrün zərurətidir”, “qeyri-ənənəvi vasitələr və onların dini danışıqla mübarizəyə təsiri”, “elektron fətva”, “uzaqdan əzbərləmə və tədris”', “kiber məkandan (irrasional) istifadə” kimi vacib mövzular əhatə olunacaq.
