Maykl Cekson haqqında 2019-cu ildə çəkilən “Leaving Neverland” sənədli filminin rejissoru Den Rid, pop ulduzun pərəstişkarları tərəfindən minlərlə ölüm təhdidinə məruz qaldığını söylədi.
Hafta.az-ın “Deadline”a istinadən yazdığına görə, Rid hazırladığı sənədli filmdə iki nəfərin uşaqlıqda məşhur müğənni tərəfindən zorakılığa məruz qaldıqlarını iddia etdikdən sonra hədəfə çevrildiyini bildirib.
Rid, "Məni tapmağa çalışan qatillər var idi. Silahlı insanlar tərəfindən güllələnməklə təhdid edildim. Dəfələrlə ölüm təhdidləri aldım" deyib.
“Deadline”a verdiyi müsahibədə Rid, 2019-cu ildə HBO tərəfindən buraxılan və böyük təsir bağışlayan ilk filmindən sonra gələn “Leaving Neverland 2”nin istehsal prosesindən danışıb. İlk sənədli filmdə Uad Robson və Ceyms Safeçuç, karyerasının zirvəsində Cekson tərəfindən uşaqlıqda cinsi istismara məruz qaldıqlarını iddia ediblər.
Film yayımlanarkən həm rejissor, həm də sənədli filmdə danışan adlar Cekson pərəstişkarlarının reaksiyası ilə üzləşib və onları “özünü müdafiə edə bilməyən günahsız bir adamdan pul qazanmağa çalışmaq”da ittihamlayıblar.
“Leaving Neverland 2” ilk filmin qaldığı yerdən davam edir, Robson və Safeçuçun Ceksonun əmlakını idarə edənlərə qarşı hüquqi mübarizəsi və iddia olunan sui-istifadədə rol oynayanları məsuliyyətə cəlb etmək səylərindən söz açır.
HBO yeni sənədli filmin istehsalında iştirak etmir. “Leaving Neverland 2” Şimali Amerikada YouTube-da “Real Stories” kanalında yayımlanacaq.
