Son araşdırmalara görə, ana südündə kök hüceyrələr aşkarlanıb ki, bu da körpələrdə orqan və toxumaların bərpasına kömək edir.
Hafta.az xəbər verir ki, bunu Səhiyyə Nazirliyi K.Fərəcova adına Elmi-Tədqiqat Pediatriya İnstitutunun pediatrı İlhamə Mirzəyeva deyib.
Həkim bildirib ki, ana südü əvəzolunmaz qidadır.
“Körpələrimizin sağlam gələcəyi üçün mütləq ana südü ilə qidalandırılmalıdırlar. Ana südü körpələrimizi bir çox xəstəliklərdən qoruyur. Uşaq doğulandan sonra ananın sinəsi üzərinə qoyulmalı və ana südü ilə qidalandırılmalıdır. Ana südünün ilk saatlardakı tərkibi ilə sonrakı günlərdəki tərkibində də fərq olur. Uşaq doğulandan sonra anada yaranan süd uşaq üçün çox faydalıdır və körpədə bir çox infeksion xəstəliklərə qarşı immunitet yaradır. Buna görə əks göstəriş yoxdursa, körpə doğulandan sonra yarım saat içərisində ana südü ilə qidalandırılmalıdır”, - deyə həkim qeyd edib.
Bir yaşa qədər körpələrin qidalanma rejimi barədə danışan həkim bildirib ki, ilk 6 ay ərzində uşaq yalnız ana südü ilə qidalandırılmalıdır. İlk 28 gündə vaxtında doğulmuş uşaq 7-8 dəfə qidalanmalıdır:
"Az çəkili, vaxtından əvvəl doğulmuş uşaqlar isə daha çox, 10-12 dəfə qidalandırılmalıdır. Uşaqlara 4 ayından etibarən tərkibində qlüten olmayan qidalardan, sıyıqlardan da vermək olar. Bunu bir çay qaşığından başlayaraq artırmaq olar".
Süd verən anaların dərman qəbulu ilə bağlı sualı cavablandıran həkim bildirib ki, sağlam ana dərman qəbul etməsə yaxşıdır:
“Lakin müəyyən dərmanlar var ki, onların qəbulu südvermə üçün əks göstəriş ola bilər. Bu da müvəqqətidir və bu zaman ana pediatrla məsləhətləşmək lazımdır. Əks göstəriş olduğu halda bu dərmanların içlik vərəqində qeyd edilir. Ümumilikdə isə süd verən ana həkim nəzarəti altında müəyyən miqdarda dərman qəbul edə bilər”.
