Talibanın 63 nəfəri şallaqlamaq qərarı BMT-nin kəskin reaksiyasına səbəb olub.
Hafta.az-ın “The Guardian”a istinadən yazdığına görə, BMT-nin Əfqanıstana Yardım Missiyasının (UNAMA) Twitter hesabından edilən açıqlamada, 14-ü qadın olmaqla 63 nəfərin açıq şəkildə şallaqlandığı bildirilib.
UNAMA öz bəyanatında şallaq cəzasına reaksiya verib və deyib: “Biz cismani cəzanı pislədiyimizi bir daha bildirir və beynəlxalq insan hüquqları öhdəliklərinə hörmət etməyə çağırırıq”.
Talibanın nəzarətində olan Ali Məhkəmə bildirib ki, şallaqlama hökmləri ölkənin şimalındakı Sari Pol vilayətindəki stadionda yerli məmurların nəzarəti altında həyata keçirilib. Məhkəmə, kimliyi açıqlanmayan şəxslərin "homoseksual əlaqə, zina və oğurluq" kimi cinayətlərə görə şallaq cəzasına məhkum edildiyini açıqlayıb.
2021-ci ilin avqustunda ABŞ-ın Əfqanıstandan çıxarılması ilə Taliban əvvəlcə Kabili, sonra isə bütün ölkəni ələ keçirib. Təşkilat qadınların universitetə getməsinə və bir çox müəssisələrdə işləməsinə qadağa qoyub.
Taliban lideri Hibətullah Axundzadənin martda şəriət qanunlarına görə zina edən qadınların ictimai yerlərdə daşqalaq və şallaqlanmaqla cəzalandırılacağı ilə bağlı açıqlaması da gündəmdə olub.
Taliban liderinin bəyanatı 14 milyona yaxın qadın və qızın yaşadığı Əfqanıstanda hüquq müdafiə təşkilatlarının tənqidi ilə üzləşib.
Fevral ayında Qəzni və Cüzcan əyalətlərində qətldə təqsirli bilinən ümumilikdə 3 nəfər güllələnərək ictimaiyyət qarşısında edam edilib.
Azad Avropa Radiosunun Əfqanıstan bölməsi olan “Azadi” Radiosuna danışan əfqan hüquq müdafiəçisi Şəhrazadə Əkbər deyib ki, Taliban-ın əsas məqsədi qorxu yaratmaqdır. “Talibanın idarəetmə tərzi insan hüquqlarına ziddir. Qadın və kişilərin insan hüquqları və ya insan ləyaqəti onlar üçün önəmli deyil".
