ABŞ-ın Ankaradakı səfiri, Prezidentin Suriya və İraq üzrə xüsusi nümayəndəsi Tom Barrak X sosial media hesabında paylaşım edərək Suriya prezidenti Əhməd Şaranı ikipartiyalı ABŞ Konqres nümayəndə heyəti ilə birlikdə Ankaraya gətirməkdən "çox şərəf duyduğunu" bildirib.
Hafta.az yazır ki, Barak bildirib: “Bu gün Ankarada prezident Əhməd Şaranı ikipartiyalı ABŞ Konqres nümayəndə heyəti ilə çox vacib yüksək səviyyəli görüş üçün qəbul etmək böyük şərəf idi. Nümayəndə heyətinə senatorlar Kris Kuns, Mayk Raunds, Dik Durbin və Lindsi Qraham, eləcə də nümayəndə Maykl Terner daxil idi. Bu görüş Suriyanın dünyanın ən mürəkkəb və sürətlə dəyişən bölgələrindən birində mərkəz nöqtəsi olaraq qaldığını açıq şəkildə nümayiş etdirir”.
Tom Barrak deyib ki, bu səviyyədə Konqres səfərləri ABŞ xarici siyasətinin təməl daşıdır, ABŞ-Suriya münasibətlərində qarşılıqlı etimada, üst-üstə düşən strateji maraqlara və uzunmüddətli regional sabitliyə ortaq öhdəliyə əsaslanan yeni və möhkəm bir dövrün impulsunu nümayiş etdirir.
“Bu an tarixi əhəmiyyət kəsb edir, çünki Suriyanın Yaxın Şərqin gələcəyinin formalaşmasında mərkəzi rolunu vurğulayır”, - Barrak deyib.
