ABŞ prezidenti Donald Trampın Rusiyaya qarşı 25 faiz neft tarifi ilə təhdid etməsi və Kiyevə təzyiqi Ukrayna faylında yeni mərhələnin baş verdiyini göstərir.
Hafta.az-ın “Business FM”ə istinadən yazdığına görə, politoloq Georgiy Bovt deyib ki, Tramp “Ukrayna ilə bağlı tez bir razılaşma əldə etmək istəyir və səbrinin tükəndiyini açıq şəkildə göstərir”. Bovtun sözlərinə görə, Trampın NBC telekanalına müsahibəsində “Putinə qəzəbləndiyini” söyləməsi və ikinci sanksiyalar dalğası tətbiq etməklə hədələməsi təkcə Moskvanı deyil, həm də Avropanı qorxudur.
Bovt hesab edir ki, Vaşinqton artıq Zelenskiyə asan həmsöhbət kimi baxmır: “Trampın əsas planı atəşkəsdən sonra Ukraynada seçkilər keçirmək və sonra yeni liderlə razılaşmaq olub, lakin Zelenski hələ də hakimiyyətdədir və siyasi rəqiblərini effektiv şəkildə aradan qaldırır”. Kiyevin ABŞ-ın təklif etdiyi mədən və infrastruktur sazişindən imtina etməsi də ABŞ ictimaiyyətində və müxalifətində narazılıq yaradıb.
"Kiyev müqavimət göstərdi, çünki bu razılaşma az qala müharibənin təzminatı kimi görünürdü, lakin indi Tramp bunu şəxsi məsələyə çevirir", - Bovt deyir.
Trampın Putinlə münasibətlərinin hələ də "birbaşa və isti" olduğuna diqqət çəkən Bovt, Moskvanın çox diqqətli olduğunu və Trampla münasibətləri pozmamağa çalışdığını bildirir. Avropanın bu prosesdə öz yol xəritəsini cızdığını və Ukraynaya hərbi müşahidəçilər və məskunlaşma birlikləri göndərmək üçün hazırlıq gördüyünü xatırladan Bovt, "Hazırda bütün tərəflər sürətli addımlar atmaqdadırlar. Yavaş və texniki detallara əsaslanan danışıqlar dövrü sona çata bilər" şərhini verib.
