Aydının Efelər rayonunda, şəhər mərkəzindən 3 kilometr aralıda yerləşən qədim şəhərdə qazıntı işləri Aydın Adnan Menderes Universitetinin professoru Dr. Murat Çəkilməzin rəhbərliyi altında aparılır.
Hafta.az yazır ki, zeytun ağacları arasında aparılan qazıntı işləri 40 min kvadratmetrlik hamam kompleksində davam edir.
Professor Dr. Murat Çəkilməz bildirib ki, iş Mədəniyyət və Turizm Nazirliyinin "Gələcək üçün miras" layihəsi çərçivəsində həyata keçirilir.
Şəhərin üzgüçülük hovuzunda keçən il başlayan qazıntıları başa vurduqlarını izah edən Çəkilməz, "Qazıntılarımızda 37 metr uzunluğunda və 12 metr enində soyuq su hovuzu aşkar etdik. Qədim dövrlərdə bu soyuq su hovuzları xüsusilə hamam komplekslərinin mərkəzi hissəsində istifadə olunurdu. Tralleisdəki nümunə təxminən 300 nəfərlik tutumu olan bir üzgüçülük hovuzudur" deyib.
Çəkilməz, xüsusilə isti yay aylarında hamama gələn insanların sərinləmək üçün hovuzdan istifadə etdiyinə inandıqlarını və binanın arxasında idman zalı (çoxməqsədli məşq kompleksi) olduğundan, orada məşq edən uşaqların da üzgüçülük hovuzundan istifadə etdiyini düşündüklərini bildirib.
O, hovuzun qədim şəhərlərdəki hovuzlardan bir qədər böyük olduğunu qeyd edərək, sözünə davam edib: "Biz inanırıq ki, hamam-gimnaziya kompleksindən hər gün 3-5 min insan istifadə edirdi. Burada məşq edən uşaqların peşəkar idmançı olmaları gözlənilirdi. Üzgüçülük onlar üçün çox vacib idi, ona görə də hər bir uşaq bu hovuzlarda üzməyi öyrənirdi. İdmançılar burada yetişdirildiyindən, bu hovuz qədim dünya üçün Olimpiya ölçüsü hesab edilə biləcək bir ölçüdə idi. Bu idmançılar digər şəhərlərdə yarışlarda da iştirak edirdilər. Buna görə də hovuz müəyyən ölçülərdə olmalı idi. Dərinliyinə baxanda, qədim hovuz standartı 1,5 metr idi və burada 1,5 metr dərinliyində bir hovuz görürük".
Qədim dövrlərdə belə quruluşun elementlərə açıq olduğunu izah edən alim deyib ki, burada bulaq suyu istifadə olunurdu. Təxminən 56 kilometr uzunluğunda bir su sistemi olub və su şəhərin şimalındakı dağlardan bura çatırmış".
Çekilmez əlavə edib ki, bütün işlər başa çatdıqdan sonra hovuzu su ilə doldurmağı planlaşdırırlar.
