Naxçıvan şəhərində yerləşən Heydər Əliyev adına Hərbi Liseyinin xidməti vəzifələrini yerinə yetirərkən şəhid olmuş məzunlarının ailə üzvləri və yaxınları ilə kursantların görüşü olub.
Əlahiddə Ümumqoşun Ordunun mətbuat xidmətindən bildirilib ki, ordunun Təlim-Tədris Mərkəzində keçirilən tədbirdə Heydər Əliyev adına Hərbi Liseyin rəisi, general-mayor Məhəmməd Həsənov liseyin keçdiyi inkişaf yolundan danışıb. Bildirib ki, Ümummilli Liderimizin xatirəsinin əbədiləşdirildiyi ilk ünvan kimi hərbi lisey gələcəyin vətənpərvər, savadlı və peşəkar zabitlərinin yetişdirilməsi yolunda inamlı addımlar atır. Ötən dövrdə liseydə nümunəvi hərbi tədris sistemi, möhkəm maddi-texniki baza yaradılıb. Əsas məqsəd Vətənimizin müdafiəsinə hazırlanan gənclərimizə hərbi işə dair bilik və bacarıqları mənimsətməkdən ibarətdir. Buna görə də hərbi liseyə daxil olan kursantlara ilk gündən Vətənə məhəbbət hissi aşılanır.
Tədbirdə hərbi liseyin müəllimi Mirismayıl Seyidov və şəhid yaxını Xanəli Kərimli çıxış edərək bildiriblər ki, Heydər Əliyev adına Hərbi Liseyin məzunları müxtəlif vaxtlarda düşmən təxribatlarının qarşısını alarkən böyük qəhrəmanlıq və şücaət göstəriblər. Hərbi liseyin 8 məzunu Vətənimizin müdafiəsi uğrunda döyüşlərdə qəhrəmancasına şəhid olub. Şərəfli zabit həyatı yaşayaraq gələcək nəsillərə örnək olmaq arzusu bu gün hər bir kursantın həyat amalına çevrilib. Hər bir gənc də Heydər Əliyev adına Hərbi Liseydə təhsil aldığına görə fəxr hissi ilə özünü əsl Vətən müdafiəçisi hesab edir.
Çıxışların ardından videoçarx nümayiş olunub, kursantlar Vətənimizə həsr olunmuş şeirləri bədii qiraət edib və ədəbi-bədii kompozisiya ilə çıxış ediblər.
