“Azərbaycan Respublikasının Prezident Administrasiyasının və Xarici İşlər Nazirliyinin dəvəti ilə, Moldovanın Azərbaycandakı səfiri olaraq, Prezident Administrasiyasının nümayəndəsi Hikmət Hacıyevin müşayiəti altında Bakıda akkreditə olunmuş diplomatik korpusun üzvləri ilə birlikdə Cəbrayıl və Zəngilan rayonlarına işgüzar səfərdə iştirak etdim. Səfər Füzuli Beynəlxalq Hava Limanına uçuşla başladı, ardınca nümayəndə heyəti Cəbrayıl şəhərinə yola düşdü. Burada Prezidentin Cəbrayıl, Qubadlı və Zəngilan rayonları üzrə xüsusi nümayəndəsi Vahid Hacıyev regionda aparılan genişmiqyaslı bərpa və yenidənqurma işləri barədə məlumat verdi. Biz tamamilə sıfırdan yenidən qurulan Horovlu kəndini ziyarət etdik – bu kənd Qarabağ bölgəsinin dirçəlişinin rəmzidir. Horovlu kəndi “yaşıl zona” statusuna malikdir və bütün enerji infrastrukturu bərpa olunan enerji mənbələri əsasında fəaliyyət göstərir. Bu, ekoloji baxımdan təmiz enerjinin istifadəsinə dair örnək bir layihədir”.
Hafta.az-ın yazdığına görə, bu barədə Moldovanın ölkəmizdəki səfiri Aleksandr Esaulenko öz sosial səhifəsində yazıb.
Diplomat qeyd edib ki, səfərin növbəti dayanacağı “Dost Aqropark” heyvandarlıq kompleksi olub – kənd təsərrüfatının və aqrar istehsalın müasir modelinə çevrilmiş layihə regionun iqtisadi canlanmasına xidmət edir.
“Daha sonra nümayəndə heyəti Hakari dəmir yolu stansiyasında aparılan tikinti işləri ilə tanış oldu. Bu obyekt strateji əhəmiyyətli Zəngəzur Dəhlizi layihəsinin tərkib hissəsidir və Azərbaycanın cənub bölgələrini beynəlxalq bazarlara birləşdirəcək mühüm nəqliyyat marşrutudur” deyən səfir bildirib ki, daha sonra onlar Qarabağın ilk “ağıllı kəndi” olan Ağalı kəndinə, sonra isə Zəngilan şəhərinə səfər edib. Heyət burada yaşayış kompleksi, məktəblər, uşaq bağçaları və məscidin bərpası ilə tanış olub.
Səfərin son mərhələsində nümayəndə heyətinin Ağbənd qəsəbəsinə səfər etdiyini xatırladan diplomat bildirib ki, burada dəmir yolu və avtomobil tunellərində aparılan tikinti işləri ilə tanış olublar.
“Səfər zamanı mən bir sıra media nümayəndələrinə müsahibələr verərək, Qarabağ bölgəsində aparılan bərpa işlərində, xüsusilə Cəbrayıl şəhəri, Horovlu kəndi və Zəngilan şəhərində əldə olunan nailiyyətlər münasibətilə Azərbaycan rəhbərliyini təbrik etdim. Həmçinin Zəngəzur Dəhlizi layihəsinin, eləcə də beynəlxalq Middle Corridor (TRIPP) təşəbbüsünün inkişafında Azərbaycanın mühüm rolunu vurğuladım” deyən Moldova səfiri təəssüratlarını bu sözlərlə tamamlayıb: “Azərbaycan hökumətini yaşıl enerji və davamlı inkişaf prinsiplərini əsas tutaraq həyata keçirdiyi layihələrə görə təbrik edirəm. Qarabağın bərpası və müasir infrastruktura malik “yaşıl region”a çevrilməsi bu istiqamətdə atılmış uğurlu addımların göstəricisidir”.
