Avstraliyanın şərqindəki Yeni Cənubi Uels əyalətinin ən əhəmiyyətli şəhəri olan Sidneydə supermarketdən ispanaq alanlar başlarına nə gələcəyindən xəbərsiz olublar.
Riviera Farms adlı şirkətin istehsal etdiyi, piştaxtalarda düzülmüş ispanaq supermarketdən evə aparılıb. İspanaq yeyən Sidney sakinləri qeyri-adi bir şeyin baş verdiyini tez anlayıblar.
Qızdırma, ağız və dəri quruluğu, bulanıq görmə və üzün qızarması kimi simptomlar sürətli ürək döyüntüsü, göz bəbəklərinin genişlənməsi, halüsinasiyalar və delirium ilə müşayiət olunub. Delirium qısa müddət ərzində şüur və qavrayış itkisi deməkdir.
Zəhərlənmiş ispanaq yeyənlər xəstəxanaya qaçarkən, yerli media 9 nəfərin xəstəxanada müalicə aldığını bildirib. "Zəhərlənmə reaksiyalarının" ortaya çıxması ilə Avstraliya səlahiyyətliləri ictimai sağlamlıq xəbərdarlığı edib.
Yeni Cənubi Uels əyalətindən Dr. Darren Roberts, "Bu günə qədər heç kim ölməyib, bu, çox yaxşı xəbərdir, amma insanlar həqiqətən xəstədirlər. Onlarda halüsinasiyalar var, orada olmayan şeyləri görürlər" deyib. Dr. Roberts bəzi xəstələrin bir gündən sonra hələ də sağlamlıqlarına qayıtmadığını da bildirib.
Yeni Cənubi Uels əyalətinin səhiyyə rəsmiləri ispanaq yedikdən sonra "qeyri-adi" təsirlər yaşayan hər kəsə "dərhal xəstəxanaya yerləşdirməyi" tövsiyə edir.
Səhiyyə rəsmiləri deyirlər ki, ilkin yoxlamalar ispanağın tullantı ilə çirkləndiyini göstərir. Ancaq ətraflı təhlil ispanağın niyə insanları xəstələndirdiyini ortaya çıxaracaq.
Sözügedən ispanağın Riviera Farms məhsulu olduğu açıqlanıb. Təsərrüfat, ispanağın 'alaq otu' ilə qarışdırılması nəticəsində zəhərli hala gəldiyini düşündüklərini söyləyib.
