Dünyanın ən böyük neft və yanacaq ixracatçılarından olan Rusiya, enerji ixracı vasitəsilə keçmiş Sovet coğrafiyasındakı ölkələr üzərində təsirini qorumağa çalışır. Uzun müddətdir ki, neft və yanacaq təchizatını siyasi və iqtisadi təsirinin əsas vasitəsi kimi istifadə edən Moskva, regiondakı bir çox ölkəni enerji sektorunda özündən asılı saxlamağı hədəfləyir.
Hafta.az yazır ki, lakin son zamanlar Türküstan bölgəsindəki dövlətlər, xüsusən də Türk Dövlətləri Təşkilatının (TDT) üzvləri, Rusiyadan enerji asılılığını azaltmaq üçün alternativ təchizatçı axtarışlarını sürətləndiriblər. Bu kontekstdə Azərbaycan, Türkmənistan və digər regional istehsalçılardan, eləcə də müxtəlif beynəlxalq bazarlardan neft və yanacaq almaq təşəbbüsləri artmaqdadır.
Bu siyahıda yer alan ölkələrdən biri olan Qırğızıstan, yanacaq təchizatında Rusiyadan yüksək asılılığını azaltmaq üçün alternativ təchizatçı ölkələrlə danışıqlara başlayıb.
Qırğızıstan Energetika Nazirliyinin açıqlamasına görə, Rusiyanın, eləcə də Belarus, Azərbaycan, Qazaxıstan, Özbəkistan və Türkmənistanın müvafiq qurumlarına rəsmi müraciətlər edilib və yanacaq idxalı ilə bağlı danışıqlar aparılır.
Nazirlik, ölkədə benzin və dizel yanacağının tədarükünün mövcud müqavilələr çərçivəsində sabit şəkildə davam etdiyini bildirib və daxili bazarın qlobal hadisələrdən birbaşa təsirləndiyini vurğulayıb.
Bəyanatda Yaxın Şərqdəki geosiyasi gərginliklərin, beynəlxalq logistikadakı problemlərin və neft qiymətlərinin artmasının da Qırğızıstanın yanacaq bazarına təsir etdiyi qeyd olunub.
Bildirilib ki, Qırğızıstan yanacaq ehtiyacının təxminən 90-95 faizini Rusiyadan idxal edir və ölkənin illik yanacaq istehlakı təxminən 1,5 milyon tondur.
Bu yaxınlarda ölkədəki bəzi yanacaqdoldurma məntəqələrində Aİ-95 və Aİ-98 benzin çatışmazlığı barədə məlumat verilib.
Bişkek hökuməti yanacaq qiymətlərinin artımını məhdudlaşdırmaq üçün 30 sentyabr tarixinə qədər yanacaq daşınması və paylanması şirkətlərinə maliyyə dəstəyi verəcək.
Bundan əlavə, Çuy bölgəsinin Kara-Balta şəhərindəki Junda Neft Emalı Zavodu ilin sonuna qədər aylıq benzin istehsalını 24 min tondan 50 min tona çatdırmağı hədəfləyir.
