Yaponiya hökuməti 2027-ci maliyyə ilinə (2027-ci il aprelin 1-dən başlayaraq) qədər ABŞ hakimiyyət orqanlarından 500-ə qədər Amerika istehsalı olan Tomaqavk qanadlı raketləri almaq niyyətindədir. Bu barədə “Yomiuri” qəzeti iki ölkənin hökumət mənbələrinə istinadən məlumat yayıb.
Nəşrin məlumatına görə, Tokio bu raketlərdən hazırda müzakirə olunan potensial düşmənin bazalarına qarşı qabaqlayıcı zərbələr endirmək hüququnun həyata keçirilməsinə şərait yaratmaq üçün istifadə etməyi gözləyir, bu barədə müzakirələr hakim Liberal Demokrat Partiyasının nümayəndələri tərəfindən fəal şəkildə aparılır. Bundan əlavə, “Tomaqavk” raketlərinin alınması planları KXDR-in raket proqramının sürətli inkişafı ilə bağlıdır.
Raketlərin alınması məsələsi noyabrın 13-də Kambocada Yaponiyanın baş naziri Fumio Kişida ilə ABŞ prezidenti Co Bayden arasında keçirilən danışıqlarda qaldırılıb. Qəzet vurğulayır ki, görüş zamanı Amerika lideri Tokionun Amerika silahlarının alıcısı kimi Vaşinqton üçün prioritet olduğunu təsdiqləyib və ABŞ hakimiyyət orqanları tərəfindən müvafiq prosedurların stabil həyata keçirilməsini təmin etmək niyyətində olduğunu bəyan edib.
“Tomahawk” raketləri modifikasiyadan asılı olaraq 2,5 min km-ə qədər məsafə qət edə bilər.
Noyabrın 28-də “Nikkei” qəzeti yazıb ki, Yaponiya Müdafiə Nazirliyi Yaponiya istehsalı olan “Type-12” gəmi əleyhinə raketlərin uçuş məsafəsini 1000 km və daha çox artırmaq niyyətindədir.
