Çinin dəniz iqtisadiyyatı 2024-cü ildə xeyli artaraq ilk dəfə10 trilyon yuanı (təxminən 1,4 trilyon dollar) keçdi.
Hafta.az-ın yazdığına görə, bu barədə Çin Təbii Sərvətlər Nazirliyinin yaydığı xəbərdə deyilir. Departamentin illik hesabatına əsasən, Çinin dəniz iqtisadiyyatı ötən il 5,9 faiz artaraq 10,54 trilyon yuan olub.
Məlumatlardan göründüyü kimi, dəniz istehsalı sənayesi inkişafın əsas amillərindən birinə çevrilib və ümumi istehsalın 30 faizdən çoxunu təşkil edib. Maraqlıdır ki, 2024-cü ildə xidmətlər sektoru 59,6 faiz təmin edərək dəniz iqtisadiyyatına ən böyük töhfəni verib. Dəniz turizmi bazarı güclü bərpa əlamətləri göstərdi, kruiz səyahətlərinə əhəmiyyətli tələbat yaranıb.
Dəniz külək enerjisi genişmiqyaslı inkişafın yeni mərhələsinə qədəm qoyub: sektorun illik elektrik enerjisi istehsalı 30 faiz artıb.
Hesabatda keçən il dəniz inkişafı layihələrində əhəmiyyətli kəmiyyət artımı da vurğulanır. Qeyd olunur ki, 2024-cü ildə səlahiyyətlilər dəniz ərazilərinin və adaların istifadəsi üçün ümumi sahəsi 263 min hektar, ümumi sərmayəsi 1,07 trilyon yuan olan 4123 yeni layihəni təsdiqləyib.
