Google Pay ödəniş xidmətinin istifadəçiləri heç bir səbəb olmadan hesablarına pul yatırıldığını qeyd ediblər.
Hafta.az-ın “Futurism”ə istinadən yazdığına görə, bəzi istifadəçilərin hesabında bir neçə dollar olduğu halda, digərlərində bu rəqəm 1000 dollara qədərdir.
İstifadəçilərə edilən bildirişlərdə bu ödənişlərin Google Pay pul köçürmə sistemini sınaqdan keçirmək üçün verilən mükafatlar olduğu bildirilib. Digər tərəfdən, məlum olub ki, şirkət əslində bu mükafatları öz məhsul tərtibatçılarına göndərmək istəyir.
Google əməkdaşları tez-tez öz proqramlarını buraxılmazdan əvvəl sınaqdan keçirirlər. Şirkət bu mükafat pullarını da testdə iştirak edən işçilərinə göndərməyi hədəfləyib. Bununla belə, mükafat da səhv nəticəsində adi istifadəçilərə göndərilib.
Texnologiya müxbiri Mixel Rahman da səhvən pul göndərilən istifadəçilərdən biri olub. O, öz Twitter hesabında yazıb: "Uhhh, Google Pay indi təsadüfən istifadəçilərə pulsuz sikkələr verir. Tətbiqi açdım və gördüm ki, "Google Pay pul köçürmə təcrübəsini sınaqdan keçirdiyim üçün" 46 dollarlıq "mükafat" qazanmışam.
Google saxta ödənişlərdən sonra istifadəçilərinə vəziyyəti izah edən e-poçtlar göndərib. Bildirilib ki, şirkət bu məktubları göndərməzdən əvvəl bəzi istifadəçilərə edilən ödənişləri də ləğv etməyi bacarıb. Digər tərəfdən, bəzi istifadəçilərin xəta fərq edilənə qədər pulu hesablarından götürdükləri anlaşılıb. Şirkət rəsmiləri pulların bu istifadəçilərdən geri alınmayacağını açıqlayıb.
