Rusiyanın ən iri bankları olan “Sberbank” və VTB-nin rəhbərləri ilk dəfə Moskva birjasında dolların məzənnəsinin 93,85 rubla, avronun məzənnəsinin isə 102 rubla çatmasına münasibət bildiriblər.
Hafta.az-ın yazdığına görə, “Sberbank”ın prezidenti German Qref “Allaha şükür ki, üzən məzənnə var. Biz ölkələr qiymətlərə müdaxilə etməyə çalışanda onların iqtisadiyyatında nə qədər problemlərin olduğunu görürük. Bu artım indi bir az sürətlə atıldı. Bununla belə, iqtisadiyyatın bütün sahələri yeni reallıqlara uyğunlaşacaq və sabitlikləşəcək. Qiymətləndirmənin hazırda optimal olub olmadığına əmin deyiləm. Hesab edirəm ki, rubl möhkəmlənməlidir, lakin o, əlbəttə, ötən ilin həddindən aşağı enməyəcək” deyib.
Qref xatırladıb ki, “Sberbank”ın 2023-cü ilin sonu üçün rublun məzənnəsi ilə bağlı təxminləri 75-78 rubl təşkil edir.
VTB-nin rəhbəri Andrey Kostin RBC-ya deyib ki, devalvasiya prosesinin dayanacağını və əks tendensiyanın başlayacağını düşünür. Üstəlik, Mərkəzi Bank faiz dərəcələrini artıracaq ki, bu da məzənnələrə təsir edəcək.
Bu arada Kremlin sözçüsü Dmitri Peskov spekulyasiyaya görə avro və dolların bahalaşa biləcəyini bildirib. Kremlin məzənnə artımının rusların alıcılıq qabiliyyətinə mənfi təsir edəcəyindən qorxması ilə bağlı suala isə Peskov bunun daha əvvəl də baş verdiyini xatırladaraq, "Əvvəllər də eniş-yoxuşlar olub. Biz çox yaxşı bilirik ki, bir qayda olaraq belə artımları gözardı edə bilmərik, spekulyativ oyunlar əhəmiyyətli dərəcədə təsirli olacaq” deyib.
Bir müddət əvvəl Mərkəzi Bankın sədri Elvira Nabiullina rublun ucuzlaşması ilə bağlı konspirasiya nəzəriyyələri yaratmamağa çağırıb və bu azalmanı xarici ticarət dinamikası ilə əlaqələndirib. Nabiullina əlavə edib ki, məzənnəni süni şəkildə dəstəkləmək cəhdləri dərin devalvasiya dövrlərində başa çatıb.
