Rusiyalı teleaparıcı Vladimir Solovyov separatçı David Babayanı “Соловьев Live” proqramına dəvət etdiyi üçün Azərbaycandan üzr istəyib. Solovyov “Соловьев Live” proqramının səhər buraxılışında bu barədə danışıb. O, separatçı Babayanı efirə dəvət etməklə siyasi səhvə yol verdiyini etiraf edib: “Böyük siyasi səhvə yol verdim. Sözü yalnız bir tərəfə verməyim mənim səhvim idi. Bu mənim səhvimdir və üzr istəyirəm, sözü Azərbaycan tərəfinə verməyə hazıram”. Bununla yanaşı, Solovyov daha sonra Azərbaycandan növbəti dəfə üzr istəyib.
Həftənin ETİRAZI
İrəvanda erməni müxalifətçilər aksiya keçirərək ölkədəki qanun səviyyəsindən narazılıqlarını bildiriblər. “Müqavimət” hərəkatının nümayəndələri Prezident İqamətgahının qarşısına xiyar qoyublar. “Baxmayaraq ki, Prezident Konstitusiyanın qorunması ilə məşğul olmalıdır, lakin o Ermənistanda tərəvəz və bostan bitkilərinin nümayəndəsidir, heç bir iş görmür və bir nəfərin göstərişinə əməl edir. Biz ona bu tərəvəzi fəaliyyətsizliyinin simvolu kimi gətirmişik, jestimizdə heç bir şəxsi təhqir yoxdur”, - deyə aksiya iştirakçıları qeyd ediblər.
Həftənin MƏŞHURLARI
Türkiyədə iyunun 28-i “Sarallar” cinayət təşkilatına qarşı həyata keçirilən əməliyyatla bağlı yeni detallar məlum olub. Məsələ ilə bağlı araşdırma çərçivəsində bir neçə tanınmış şəxsin polis bölməsinə çağırıldığı məlum olub. Məlumata görə, dindirilmək üçün çağırılan məşhurlar sırasında müğənni Aylin Coşkun, aktyorlar Necati Şaşmaz, Erkan Petekkaya və aparıcı Sinan Engin də var.
Həftənin QONAĞI
Türkiyəli aktyor Burak Özçivit Bakıya gəlib. Bu barədə o, instaqram hesabında məlumat verib. “Səhər-səhər Bakıda”, - paytaxt aeroportundan foto paylaşan Özçivit yazıb. Qeyd edək ki, B. Özçivit Bakıda kikboksla bağlı tədbirdə iştirak edib.
Həftənin ƏSGƏRİ
FHN əməkdaşı cüdo üzrə beynəlxalq turnirdə qızıl medal qazanıb. 2-3 iyul 2022-ci il tarixlərində Rumıniyanın Kluj-Napoka şəhərində Cüdo üzrə böyüklər arasında Açıq Avropa turniri keçirilib. Yarışda 32 ölkənin 200-dən artıq idmançısı iştirak edib. Beynəlxalq turnirdə Azərbaycan cüdo millisinin üzvü Fövqəladə Hallar Nazirliyinin Mülki müdafiə qoşunlarının əsgəri Murad Fətiyev 90 kq çəki dərəcəsində bütün rəqiblərinə qalib gələrək yarışın qızıl medalına sahib olub.
Həftənin MƏĞLUBİYYƏTİ
Ölkəmizi UEFA Çempionlar Liqasında təmsil edən “Qarabağ” yeni mövsümdə ilk matçına çıxıb. Qurban Qurbanovun komandası qitənin bir nömrəli yarışının 1-ci təsnifat mərhələsində Polşa “Lex”i ilə qarşılaşıb. “Köhlən atlar” “Lex”lə ilk matçını Polşada keçirib və minimal hesabla məğlub olub. Komandaların cavab matçı bir həftə sonra Bakıda baş tutacaq.
Həftənin MƏRHUMU
OPEC-in baş katibi Məhəmməd Barkindo vəfat edib. Bu barədə Nigeriya Milli Neft Şirkətinin direktoru bildirib. Qeyd olunur ki, M.Barkindo 63 yaşında Nigeriyada dünyasını dəyişib. Məhəmməd Barkindo 2016-cı ildə OPEC-in baş katibi seçilmişdi.
