“Amerikalılar təyyarələrinin əksəriyyətini Kiprə köçürüblər. Kiprə o qədər raket atacağıq ki, amerikalılar oradan da qaçacaqlar”.
Hafta.az yazır ki, bu açıqlamanı İran İnqilab Keşikçiləri Korpusu (SEPAH) daxilindəki raket qüvvələrinin komandir müavini general Sərdar Cabbari verib. Onun sözləri İranın ABŞ və Qərbin Şərqi Aralıq dənizindəki hərbi mövcudluğuna qarşı yeni bir hərbi mesajı kimi şərh edilib.
Ekspertlərin fikrincə, İranın bu açıqlaması ABŞ-a Yaxın Şərq və Şərqi Aralıq dənizindəki bazaları hədəf ala bilən ballistik raket imkanlarına malik olduğunu xatırladaraq çəkindirici rol oynayır.
İranda siyasi cəbhədə də əhəmiyyətli inkişaflar baş verir. Yeni lider seçilənə qədər ölkəni idarə edəcək Müvəqqəti Liderlik Şurasının ruhani üzvü Ayətullah Əli Reza Ərafi vəzifəyə başladıqdan bəri ilk dəfə ictimaiyyət qarşısında çıxış edib. İranın yarı-rəsmi Fars Xəbər Agentliyinin məlumatına görə, Ərafi şuranın iş metodları ilə bağlı mühüm mesajlar verərək bildirib ki, Müvəqqəti Liderlik Şurası Ekspertlər Məclisi yeni lider seçənə qədər dövlət işlərini idarə etmək üçün müntəzəm iclaslar keçirəcək. “Ekspertlər Məclisi yeni lider seçmək üçün sürətlə hərəkət edəcək. O vaxta qədər Şura işlərini müntəzəm iclaslar vasitəsilə həyata keçirəcək”, - Ərafi deyib.
Çıxışında Ərafi ABŞ və İsrailin İrana qarşı aqressiv siyasətinin səhv hesablama olduğunu iddia edib. Ayətullah Ərafi həmçinin İranın hərbi və siyasi qurumlarının birliyini vurğulayaraq deyib ki, “Hörmətli silahlı qüvvələrimizə və böyük İran millətinə əminlik verirəm ki, ölkənin bütün qüvvələri sizin xidmətinizdədir”.
