Yerdənkənar Sivilizasiyaların Axtarışı (SETI) layihəsinin tədqiqatçıları müəyyən ediblər ki, yadplanetli sivilizasiyalardan gələn radiosiqnallar ulduz küləkləri və güclü alışmaların təsiri altında təhrif oluna və "bulanıqlaşa" bilər. Nəticədə müasir radioteleskoplar bu siqnalları tanımaqda çətinlik çəkə bilər.
Hafta.az xəbər verir ki, araşdırmanın nəticələri "The Astrophysical Journal" elmi jurnalında dərc olunub.
İndiyədək alimlər hesab edirdilər ki, inkişaf etmiş sivilizasiyalar rabitə üçün təbii kosmik səs-küydən asanlıqla seçilən darzolaqlı radio siqnallarından istifadə edə bilərlər. SETI proqramlarının əksəriyyəti də məhz belə siqnalların axtarışına yönəlib.
Lakin yeni tədqiqat göstərib ki, radiosiqnallar hələ öz ulduz sistemini tərk etməzdən əvvəl əhəmiyyətli dərəcədə dəyişə bilər. Alimlərin qənaətinə görə, ulduz küləkləri, alışmalar və tac kütləsinin atılmaları darzolaqlı siqnalları genişləndirərək onları mövcud axtarış alqoritmləri üçün daha az nəzərəçarpan edir.
Fərziyyəni yoxlamaq məqsədilə tədqiqatçılar Günəş sistemi vasitəsilə Yerin kosmik aparatlarının göndərdiyi radiosiqnalları təhlil ediblər. Məlum olub ki, Günəşin aktivliyinin yüksək olduğu dövrlərdə siqnalların genişlənməsi daha da güclənir.
Daha sonra alimlər oxşar prosesləri digər ulduz sistemləri üçün modelləşdirərək diqqəti xüsusilə qalaktikada ən çox rast gəlinən ulduzlar olan qırmızı cırtdanlara yönəldiblər. Araşdırma göstərib ki, məhz bu tip ulduzların ətrafında siqnalların təhrif olunması xüsusilə güclü ola bilər. Bəzi hallarda bu, potensial texnosiqnalları fon səs-küyündən demək olar ki, seçilməz vəziyyətə gətirir.
Tədqiqat müəlliflərinin fikrincə, bu amil indiyədək yerdənkənar mənşəli siqnalların aşkar edilməməsini qismən izah edə bilər. Onların qənaətinə görə, problem yadplanetli sivilizasiyaların mövcud olmamasında deyil, müasir axtarış metodlarının real şəraitdə ciddi dəyişikliklərə məruz qala bilən siqnallar əvəzinə həddindən artıq dar və "təmiz" siqnallara yönəlməsindədir.
