Rusiya Bankının makroiqtisadi proqnoz sorğusunda iştirak edən analitiklər 2024-cü il üçün rubl və inflyasiya gözləntilərini pisləşdiriblər. Yeni proqnozlara görə, 2024-cü ilin sonunda dolların məzənnəsi 91,2 rubl təşkil edəcək.
Hafta.az-ın yazdığına görə, bu rəqəm əvvəlki qiymətləndirmədə 90,4 rubl idi. Bundan əlavə, analitiklər 2025 və 2026-cı illər üçün daha bədbindirlər: Dolların 2025-ci ildə 95 rubl, 2026-cı ildə isə 97,5 rubl olacağı təxmin edilir.
Analitiklər inflyasiya proqnozlarına da yenidən baxıblar. Oktyabr ayı proqnozlarına görə, 2024-cü ilin sonuna inflyasiya 7,7 faiz təşkil edəcək. Bu göstərici əvvəlki təxmin olan 7,3 faizdən yüksəkdir. Mərkəzi Bank inflyasiyanın 6,5 faizlə 7 faiz arasında olacağını təxmin edərkən, 2025-ci ildə hədəflənən 4 faiz səviyyəsinə çatacağını bildirir.
Bundan əlavə, analitiklər 2024-cü il üçün orta faiz dərəcəsi proqnozunu 17,3 faizə qədər artırıblar. 2024-cü ilin oktyabr-dekabr dövründə faiz dərəcələrinin 20 faizə çatacağı gözlənilir. 2025-ci ilə qədər faiz dərəcələrinin 18 faizə yüksələcəyi təxmin edilir. Faiz dərəcələrinin yalnız 2027-ci ildə birrəqəmli səviyyələrə düşəcəyi gözlənilir.
Digər tərəfdən, ekspertlər də neftin qiymətində azalma gözləyirlər. Neftin bir barel qiymətinin 2024-cü ildə orta hesabla 81 dollar olacağı təxmin edilir. Bundan əlavə, oktyabr ayında rubl dollar, avro və yuana nisbətdə dəyər itirməkdə davam edib.
