Türkmənistan Dövlət Rəssamlıq Akademiyasının qalereyasında qədim Çin atçılıq mədəniyyətini və Dehua ağ çini sənətini təqdim edən sərgi açılıb.
Hafta.az-ın yazdığına görə, sərgidə nümayiş üçün Aşqabada 150-dən çox qədim Çin atlı yəhəri gətirilib. Bu nadir eksponatlar keçə və ya dəri ilə örtülmüş taxta çərçivəli, dəri qayışlı, bəzən isə dəri, sümük və ya buynuzla işlənmiş çəngəl və arxa dırnaqlı konstruksiyalardır.
Qalereya salonlarında atçılıq atributları ilə yanaşı, fotoqrafiya, xəttatlıq və rəssamlıq, heykəltəraşlıq, xəz rəsmləri, yarış atları mövzusunda naxışlı və kağız məmulatları sahəsində də əsərlər təqdim olunur. Bütün bunlar Çinin atçılıq mədəniyyətinin müxtəlif inteqrasiyasını və dərin məzmununu nümayiş etdirir. Dehua Ağ Çini sərgisi bu sənətin zəngin mədəni məzmununu və dünya estetikasını nümayiş etdirən 40-dan çox yüksək bədii müasir çini məmulatı özündə cəmləyir. Sərgidə sürətli atlarla bağlı çini təsvirləri də nümayiş olunur.
Tədbir Çinin bir sıra idarələri, iki ölkənin səfirlikləri, həmçinin Türkmənistan Mədəniyyət Nazirliyi, Beynəlxalq Atçılıq Akademiyası, Türkmənistan Dövlət Rəssamlıq Akademiyası və bir sıra digər strukturlarla əməkdaşlıq çərçivəsində təşkil olunub.
Sərginin açılış mərasimində Çin Milli Muzeyinin və Çin At Sənayesi Assosiasiyasının nümayəndələri Türkmənistan Mədəniyyət Nazirliyinə və Türkmən Atları Dövlət Assosiasiyasına türkmən ədəbiyyatı klassikinin anadan olmasının 300 illiyinə həsr olunmuş çin dilində “Maxtumkuli” poeziya toplusunu, həmçinin ağ çinidən hazırlanmış nəfis əşyaları hədiyyə ediblər.
Sərgi iyunun sonuna qədər ziyarətçilərin üzünə açıq olacaq.
