Robert Douney Jr. bu günə qədər bir filmə görə ən yüksək maaş alan kino ulduzu olmağa hazırlaşır.
Hafta.az-ın yazdığına görə, 11 il Marvel Sinematik Kainatında (MSE) “Dəmir adam” obrazını canlandıran aktyor komiks seriyasına fərqli bir rolla qayıdır.
“Variety”nin eksklüziv mənbələrinə əsaslanaraq verdiyi xəbərə görə, “Marvel” iki yeni “Avengers” filminin rejissorluğu üçün Entoni və Co Russoya 80 milyon dollar ödəyəcək.
Russo qardaşları daha əvvəl “Avengers: Infinity War” və “Avengers: Endgame” kimi Marvel istehsalatlarında rejissor kreslosunda oturmuşdular.
“Avengers: Doomsday” və “Avengers: Secret Wars” adlı iki yeni filmi ilə MSE-yə qayıdan Douney Jr., bu dəfə fərqli bir rolla tamaşaçıların qarşısına çıxacaq. Mənbələr Doktor Doom adlı cani ilə böyük ekrana qayıdacaq aktyorun Russo qardaşlarından "xeyli daha çox" ödəniş alacağını bildirib. Bu məbləğə aktyorun kassa gəlirlərindən alacağı ödəniş daxil deyil.
Film üçün alacağı qonorarla Douney Jr. Hollivudda film üçün ən çox qazanan aktyor rekordunu qıracaq. Hazırda bu başlıq “The Rock” kimi tanınan Duayn Consona məxsusdur. Ona 2024-cü ilin “Red One” üçün 50 milyon dollar ödənilib.
Douney Jr, yeni Marvel filmlərinin kassa gəlirlərindən alacağı ödənişlərlə bir filmdən ən çox qazanan aktyor rekordunu da qıra bilər.
Bruk Uilis “Sixth Sense”, Tom Kruiz “Top Gun: Maverick” və Uill Smit “Men in Black 3” filmindəki rollarına görə kassa gəlirlərindən aldıqları bonuslarla təxminən 100 milyon dollar qazandılar.
“Variety” bildirir ki, indiyə qədər MSE-nin ən çox qazanan aktyoru olan Douney Jr. komiks seriyasının filmlərindən 500-600 milyon dollar qazanıb.
Russo qardaşlarının yeni “Avengers” filmlərinin çəkilişlərinə 2025-ci ilin yazında Böyük Britaniyada başlanacağı gözlənilir.
