Ötən il Azərbaycandan Ümrə ziyarətinə 15380 zəvvar gedib

19:05 27.02.2024 Müəllif:Vüsal Tağıbəyli
Yazını böyüt
Yazını kiçilt

"Bakı ilə Səudiyyə Ərəbistanının şəhərləri arasında birbaşa uçuşların sayı həftədə 20 reysə çatıb. Bununla bağlı, “Flynas” hava şirkətinin Bakı-Ciddə marşrutu üzrə ucuz qiymətli reyslərinin artdığını məmnuniyyətlə elan edirəm. Uçuşlar həftədə 3-dən 7-yə çatdırılıb ki, bu da ayda 80-dən çox reys deməkdir. Biz bu təşəbbüsün Azərbaycan Respublikasından daha çox zəvvarın İki Müqəddəs Məscidi, həmçinin Krallığın digər bölgələrini ziyarət etməsinə şərait yaradacağını gözləyirik".

Hafta.az-ın Azərtac-a istinadən yazdığına görə, bunu Bakıda səfərdə olan Səudiyyə Ərəbistanının Həcc və Ümrə naziri Taufiq bin Fauzən əl-Rabiə brifinqdə deyib.

Nazir bildirib ki, dövlət qurumları və özəl sektor tərəfindən həyata keçirilən birgə və bir-birini tamamlayan səylər Azərbaycandan olan Ümrə zəvvarlarının sayının artmasına töhfə verib. Belə ki, zəvvarların sayı 2023-cü ildə 15380-ə çatıb.

“Hazırda biz bir sıra dövlət qurumları və özəl sektorla əməkdaşlıq edərək, Peyğəmbərin pak həyatı ilə bağlı tarixi yerlərin, abidələrin, digər arxeoloji ərazilərin ziyarətçilərin qəbulu üçün əlçatan olması, abadlaşdırılması üzərində işləyirik. Bu gün mən və həmkarlarım Qafqaz Müsəlmanları İdarəsinin sədri qardaşım şeyxülislam Allahşükür Paşazadə həzrətləri ilə səmərəli və konstruktiv görüş keçirdik. Burada biz Azərbaycan Respublikasından daha çox zəvvar və ziyarətçinin səfərini asanlaşdırmaq üçün bütün imkanlardan istifadə etmək, habelə bir sıra təşəbbüsləri və tədbirləri müzakirə etdik. Mən Azərbaycan Respublikasındakı qardaşları Səudiyyə Ərəbistanı Krallığına səfər etməyə, Ümrə ayinlərini yerinə yetirməyə, İki Müqəddəs Məscidi ziyarət etməyə, tarixi və mədəni abidələrə malik digər bölgələrə gedərək Krallığın zəngin coğrafi və mədəni müxtəlifliklərindən zövq almağa dəvət edirəm”, - deyə nazir əl-Rabiə vurğulayıb.

Oxunma sayı 240
Siyasət rubrikasından digər xəbərlər