Qlobal mayeləşdirilmiş təbii qaz (LNG) tələbatının 2050-ci ilə qədər 65 faiz artaraq 700 milyon tona çatacağı proqnozlaşdırılır.
Hafta.az xarici mediaya istinadla xəbər verir ki, bu barədə “Shell” şirkətinin məlumatında deyilir.
Bildirilir ki, bu, ölkələrin çevik və etibarlı enerji mənbələri axtarışı ilə bağlıdır. Ötən il 422 milyon ton olan qlobal LNG ticarətinin 2026-cı ildə əhəmiyyətli dərəcədə artacağı gözlənilirdi. Lakin Hörmüz boğazından keçən daşınmalarda ciddi fasilələr münaqişənin başlanğıcından bəri aylıq LNG tədarükünün təxminən beşdəbirini dayandırdı, spot bazar qiymətlərini artırdı və bəzi Asiya ölkələrinə mənfi təsir göstərdi.
LNG tədarükünün azalması, Şimali Amerikada yeni mayeləşdirmə qurğularının istifadəyə verilməsi, mövcud qurğuların fəaliyyətinin yaxşılaşdırılması və bəzi Asiya ölkələrindən LNG idxalının azalaması ilə Yaxın Şərq tədarükündəki fasilələr qismən kompensasiya edildi. Hörmüz boğazından daşınmaların yay aylarında normal vəziyyətə qayıtması və 2027-ci ildə artımın bərpa olunması ehtimalı ilə qlobal LNG ticarətinin bu il ötən illə eyni səviyyədə qalması gözlənilir.
Eyni zamanda, 2030-cu ilə qədər hər il təxminən 180 milyon ton yeni LNG tədarükünün bazara daxil olması, təbii qaza çıxışı və onun əlverişliliyini dəstəkləməsi, yeni bazarlarda tələbat yaratması proqnozlaşdırılır. Cənubi və Cənub-Şərqi Asiya ölkələrində idxal infrastrukturuna, yenidən qazlaşdırma gücünə və boru kəməri bağlantısına güvənərək bu bölgələrin sürətlə artan enerji tələbatını kömürlə müqayisədə daha az emissiyalı alternativlərlə ödəyəcəyi və 2050-ci ilə qədər qlobal LNG idxalının təxminən 40 faizini təşkil edəcəyi nəzərdə tutulur.
Yaponiya kimi daha inkişaf etmiş LNG bazarlarına malik ölkələrdə məlumat mərkəzlərinin elektrik enerjisi tələbatının yeni bir mənbəyi kimi ortaya çıxacağı proqnozlaşdırılır. Avropada LNG daxili qaz istehsalının azalması ilə paralel olaraq bərpaolunan enerjinin fasiləli istehsal strukturunu tarazlaşdırmaq üçün enerji təhlükəsizliyinin təmin edilməsində mühüm rol oynayacaq. Artan tələbatı ödəmək üçün 2030-cu və 2040-cı illər ərzində artıq tikilməkdə olan layihələrə əlavə olaraq, yeni LNG mayeləşdirmə qurğularına əhəmiyyətli əlavə investisiya qoyuluşu tələb olunacaq ki, bu da ildə təxminən 200 milyon ton yeni tədarükü tələb edir.
“Shell”in İnteqrasiya olunmuş Qaz Bölməsinin rəhbəri Sederik Kremers Yaxın Şərqdə yaranan pozuntunun iqtisadiyyatın bütün sektorlarına təsir edən sistemli şok effekti yaratdığını bildirib: “Lakin LNG sənayesi dəyişən bazar şərtlərinə davamlığını və uyğunlaşma qabiliyyətini sübut edib. Həm təklif, həm də tələb infrastrukturuna daha çox investisiya tələb olunsa da, uzunmüddətli perspektiv güclü olaraq qalır və LNG qlobal enerji sistemində sabitləşdirici qüvvə olaraq qalacaq”.
