Türkiyənin Energetika və Təbii Sərvətlər naziri Alparslan Bayraktar Çinlə nüvə stansiyasının tikintisinə dair danışıqların inkişaf mərhələsinə keçdiyinə diqqət çəkib.
Hafta.az-ın Bloomberg-ə istinadən yazdığına görə, Ankarada jurnalistlərlə görüşən Bayraktar Körfəz ölkələri ilə danışıqlardan nüvə stansiyası layihələrinə qədər bir çox mövzuda sualları cavablandırıb. Bayraktarın görüşdə verdiyi ən yeni mesaj Çinlə 3-cü nüvə stansiyası danışıqları ilə bağlı olub. Son olaraq Çin Milli Enerji Administrasiyasının sədr müavini He Yanqın Ankara səfərindən danışan Bayraktar uzun müddətdir davam edən danışıqların son mərhələyə çatdığını bildirib.
Kırklareli İynəadada qurulması planlaşdırılan elektrik stansiyası ilə bağlı Bayraktar, “Çox vacib nöqtəyə gəldik, yaxın bir neçə ay ərzində bunu yekunlaşdırmalıyıq. Çünki yenə də başqa maraqlı tərəflər var, biz artıq sazişin müəyyən hissəsi üçün kifayət qədər danışıqlar aparmışıq və nəticəyə kifayət qədər yaxınıq” bildirib. Tərəflər arasında bəzi fikir ayrılıqlarının olduğunu, lakin bunların böyük olmadığını izah edən Bayraktar, "Ona görə də boşluğu doldurub, nüvə enerjisi proqramı üçün tezliklə Çinlə müqavilə bağlaya bilərik" deyə əlavə edib.
Nüvə enerjisi olmadan yalnız Türkiyənin deyil, dünyanın qalan hissəsinin də əsrin ortalarınadək karbon neytrallığına çata bilməyəcəyini bildirən Bayraktar, Akkuyuda ilk elektrik stansiyasının tikintisi ilə bağlı bunları deyib: “Birinci bloku tamamladıq. reaktor və əsas tikinti işləri başa çatıb. Bildiyiniz kimi, bu, dünyanın ən böyük nüvə tikinti sahəsidir. Biz bu elektrik stansiyasından təxminən 4,8 GVt elektrik enerjisi istehsal edə biləcəyik" deyə qeyd edib.
Sinopda planlaşdırılan 2-ci elektrik stansiyası üçün ruslarla danışıqların davam etdiyini və Cənubi Koreya ilə də təmasların olduğunu xatırladan Bayraktar, Türkiyənin bu mövzuda prioritetinin daha çox texnologiya transferi olduğunu vurğulayıb.
Türkiyənin uzunmüddətli enerji planlarına uyğun olaraq 20 GVt-dan çox AES-ə ehtiyacı olduğunu vurğulayan Bayraktar kiçik modul reaktorlarla bağlı bəzi ölkələrlə danışıqların davam etdiyini də bildirib. Bayraktar qeyd edib ki, bu kontekstdə 5 GVt-lıq kiçik modul reaktorlar sistemə daxil edilə bilər.
