ABŞ və İsrailin İrana hücumlarından sonra bölgədə gərginlik artdıqca, İnqilab Keşikçiləri Korpusuna (SEPAH) yaxın bir mənbə Tehranın "düşmənlərin neft təchizatı xətlərini" hədəf alacağını açıqlayıb. İran dövlət mediasının yaydığı açıqlamada bölgədən neft ixracının davam etdirilməsinə icazə verilməyəcəyi vurğulanıb.
Hafta.az yazır ki, SEPAH-ın baş komandanının baş müşaviri İbrahim Cabbari bildirib ki, "Hörmüz boğazı bağlıdır. Kimsə keçməyə çalışarsa, İnqilab Keşikçilərinin və nizami donanmanın qəhrəmanları həmin gəmiləri yandıracaqlar".
Bölgədəki yüksək vəzifəli ərəb mənbələri “Middle East Eye”ə bildiriblər ki, İranın "düşmən neft xətləri" dedikdə, çox güman ki, Bakı-Tbilisi-Ceyhan (BTC) boru kəmərinə aiddir. BP-yə məxsus BTC boru kəməri Azərbaycandan Gürcüstan və Türkiyə vasitəsilə Aralıq dənizinə xam neft nəql edir. Mənbələrə görə, İsrailin neft təchizatının təxminən 30 faizi bu boru kəməri vasitəsilə həyata keçirilir.
Bir mənbə bildirib ki, "İranın "düşmən neft boru kəmərləri" ilə bağlı təhdidi yalnız BTC-ni nəzərdə tuta bilər. Bu boru kəməri İsrailin əsas xam neft təchizatçılarından biridir".
Boru kəməri Azərbaycandan Gürcüstana, oradan isə Türkiyədəki Ceyhan limanına qədər uzanır. Neft Ceyhandakı Heydər Əliyev Terminalından İsrailə tankerlərlə daşınır.
Yüksək vəzifəli İran mənbələri iddia edirdi ki, İsrail son illər "İrana və regiona qarşı çirkli işlərini Azərbaycan üzərindən həyata keçirir".
Bu hadisələr İranın pilotsuz təyyarəsinin Səudiyyə Ərəbistanının Ras Tanura şəhərindəki Saudi Aramco neft emalı zavodunda məhdud yanğına səbəb olmasından sonra baş verdi.
