2024-cü ildə Rusiyaya gələn əcnəbilərin sayı əvvəlki ilə nisbətən 8,2 faiz artaraq 16,7 milyona çatıb.
Hafta.az-ın “RBC”ya istinadən yazdığına görə, turistik səyahətlər əvvəlki illə müqayisədə böyük artım göstərib və iki dəfə yüksəlib. Çin və Səudiyyə Ərəbistanından gələn turistlərin sayında əhəmiyyətli artımlar olsa da, Avropa İttifaqı ölkələrindən gələnlərin sayında azalma davam edir.
Rusiyaya ən çox turist göndərən ölkə Qazaxıstan olub. Rusiyaya gələn Qazaxıstan vətəndaşlarının sayı 7,7 faiz artaraq 3,4 milyon nəfərə çatıb. Bu ölkəni 3,3 milyon nəfərlə Özbəkistan və 1,7 milyon nəfərlə Tacikistan izləyir. Çin 1,69 milyon nəfərlə dördüncü yerdədir.
Avropadan Rusiyaya səfərlərin azalması davam edir. Aİ ölkələrindən gələn ziyarətçilərin sayı 2023-cü ilə nisbətən 16 faiz azalaraq 469200-ə düşüb. Ancaq Almaniyadan gələnlərin sayı 17 faiz artaraq 119500-ə çatıb. Fransadan 15 faiz artımla 17900, İtaliyadan 11 faiz artımla 24200 və İspaniyadan 22 faiz artımla 7600 ziyarət olub. Digər tərəfdən, Finlandiyadan gələnlərin sayı 12 dəfə azalaraq 5900-ə düşüb.
Turist səfərlərində ən böyük artım Çindən olub. Çinli turistlərin sayı əvvəlki ilə nisbətən 4 dəfə artaraq 848 minə, Səudiyyə Ərəbistanından gələn turistlərin sayı isə 7 dəfə artaraq 55100-ə çatıb. Bundan əlavə, İrandan 68 faiz, Hindistandan 59 faiz və Kubadan 52 faiz çox ziyarətçi gəlib.
