Əfqanıstanda psixi sağlamlıq mərkəzində olan qadınlar deyirlər ki, ailələri tərəfindən tərk edildikləri üçün gedəcək yerləri yoxdur.
Hafta.az-ın yazdığına görə, BBC Kabilin qərbində, Əfqanıstan Qızıl Aypara Cəmiyyətinin idarə etdiyi qadın psixi sağlamlıq mərkəzinə baş çəkib. 104 nəfərin yaşadığı müəssisə ölkədə qadınlara həsr olunmuş nadir psixi sağlamlıq mərkəzlərindən biridir.
Bu, mərkəzin həddindən artıq sıxlığını və qeyri-adekvat kadr təminatını üzə çıxarır. Reportajda kimlikləri gizlədilən qadınlar üzləşdikləri çətinliklərdən bəhs edirlər.
20 yaşlarında olan Məryəm ailədaxili zorakılığa məruz qaldıqdan və evdən atıldıqdan sonra mərkəzə gətirildiyini deyir.
Təxminən 9 ilə yaxındır ki, müəssisədə qalan gənc qadın deyir: “Valideynlərimin yanına qayıtmağı gözləmirəm. Kabildə kiminləsə evlənmək istəyirəm. Evə qayıtsam belə, onlar məni yenidən qovacaqlar”.
28 yaşlı Həbibə ikinci əri tərəfindən qovulduğunu deyir. Bildirir ki, əri onu evə qoymur, dul qalmış anası da ona baxa bilmir.
Üç oğlunun əmiləri ilə yaşadığını qeyd edən Həbibə “Uşaqlarıma qovuşmaq istəyirəm” deyir.
16 yaşlı Zeynəb obyektin ən gənc sakinlərindən biridir. 2022-ci ildə məktəbində baş verən bombalı hücumdan sonra travma aldığı bildirilir, o, yer çatışmazlığı səbəbindən əvvəlcə müəssisəyə qəbul oluna bilməyib.
Psixi sağlamlıq mərkəzində çalışan psixoterapevt Səlimə Halib qadınların çətin vəziyyətini belə izah edir: “Bəzi xəstələr ailələri tərəfindən tamamilə tərk edilib. Heç kim onlara baş çəkməyə gəlmir, çoxları burada yaşayıb ölür”.
Kabildə Əfqanıstan Qızıl Aypara Cəmiyyətinə bağlı xəstəxanada çalışan psixiatr Əbdül Vəli Utmanazi də cəmiyyətdə depressiyanın geniş yayıldığını qeyd edir. O deyir ki, gördüyü insanların 80 faizi ailə problemləri yaşayan gənc qadınlardır.
ABŞ 2021-ci ilin avqustunda ölkədən çıxdıqdan sonra “Taliban” hakimiyyəti ələ keçirdi. 2022-ci ilin noyabrında qadınların parklara və istirahət zonalarına getməsi yasaqlandı. Bundan əlavə, qadınların bir çox sektorlarda işləməsinə və ya 6-cı sinifdən yuxarı təhsil almasına icazə verilmir. Təhsil qadağası “Taliban” rəhbərliyi daxilində münaqişəyə səbəb olub.
