Sincan-Uyğur Muxtar Rayonunun inzibati mərkəzi olan Urumçidə, Çin-Avrasiya İnvestisiya və Ticarətin Təşviqi Mərkəzinin hərtərəfli xidmət zalının açılış mərasimi keçirilib.
Hafta.az xatırladır ki, mərkəzin filialları daha əvvəl Qazaxıstan və Tacikistanda da açılıb.
“Mərkəz 82 yerli və xarici qurumu birləşdirib, Qazaxıstan və Özbəkistan kimi ölkələrdə xüsusi ticarət-iqtisadi tədqiqatlar aparmaq üçün 50-dən çox müəssisə təşkil edib”, - deyə Mərkəzin rəhbəri Vanq Honq bildirib.
Tacikistan şirkətlərindən birinin nümayəndəsi qeyd edib ki, Mərkəzin Tacikistanda filialının yaradılması iki ölkənin müəssisələri arasında qarşılıqlı əlaqə üçün səmərəli körpü qurub. Daimi işgüzar danışıqlar, sənaye forumları və digər tədbirlər sayəsində Tacikistan və Çin müəssisələri arasında mübadilə və əməkdaşlıq dərinləşəcək.
Çin və Mərkəzi Asiya bazarlarının inkişafı ilə məşğul olan xarici müəssisələrin nümayəndələri də Çin tərəfdaşları ilə kənd təsərrüfatı, enerji və infrastruktur kimi sahələrdə əməkdaşlığın dərinləşdirilməsinə, eləcə də ikitərəfli investisiyaların asanlaşdırılmasına ümidvar olduqlarını bildiriblər.
Xatırladaq ki, Çin-Avrasiya İnvestisiya və Ticarətin Təşviqi Mərkəzi bu ilin aprelində Urumçidə fəaliyyətə başlayıb və artıq 11 ölkə ilə əməkdaşlıq qurub. Mərkəzin ölkədə 4, xaricdə isə 3 filialı var.
Mərkəzin 4 əsas funksiyası mövcuddur: məlumat mübadiləsi, siyasət üzrə məsləhətləşmə, investisiya əməkdaşlığı və ticarətin asanlaşdırılması. Mərkəz 9 sahədə - inzibati, hüquqi, maliyyə-vergi, maliyyə, kommersiya, logistika, elmi-texniki, mədəni və kadrlar müstəvisində xidmət göstərir.
“Bir kəmər, bir yol” təşəbbüsünün əsas bölgəsi kimi Sincan-Uyğur Muxtar Rayonu Mərkəzi Asiya ölkələri ilə ticarət və iqtisadi əlaqələri davamlı olaraq dərinləşdirir və onların ikitərəfli ticarət həcmi durmadan artır.
