Bakının mərkəzində Slovakiya qrafikalarından ibarət sərginin açılışı olub. Slovakiyanın Azərbaycandakı səfirliyinin təşəbbüsü ilə keçirilən sərgi həm də iki ölkə arasında diplomatik əlaqələrin qurulmasının 30-cu ildönümünə həsr olunub.
Hafta.az-ın yazdığına görə, sərginin açılışında çıxış edən Slovakiyanın ölkəmizdəki səfiri Milan Layçak sərgi haqqında qısa məlumat verib. Səfir bildirib ki, diplomatik münasibətlərin 30-cu ildönümü münasibətilə təşkil olunacaq tədbirlərin siyahısı bu sərgi ilə məhdudlaşmır, irəlidə bir sıra tədbirlərin keçirilməsi də nəzərdə tutulub.
“Biennali Bratislava illüstrasiyaları” sərgisində slovak illüstratorların əsərləri nümayiş olunur. Əsərlər 60-dan çox Qran Pri qaliblərinə məxsusdur.
Tədbirdə xarici ölkələrin Azərbaycandakı səfirləri, ictimaiyyət nümayəndələri iştirak ediblər.
Bir az da “Biennali Bratislava illüstrasiyaları” tədbiri haqda oxuculara məlumat verək.
Uşaq kitabları illüstrasiyalarının orijinallarının beynəlxalq müsabiqəsinə başlamaq ideyası 1960-cı illərin əvvəllərində yaranıb və ilk dəfə Bratislava İllüstrasiyalar Biennalesi (BIB) 1967-ci ildə keçirilib. Təsisçilər arasında Dr. Duşan Roll, rəssam Miroslav Cipar, rəssam Albin Brunovski və uşaq kitablarının illüstrasiyasına dair digər həvəskarlar daxildir.
BIB-nin hədəfi və missiyaları əvvəldən müəyyən edilib - uşaqlar üçün kitab mədəniyyəti və illüstrasiya ənənələri olan ölkələrin ən yaxşı incəsənət nümunələrinin təqdimatı üçün imkanlar təklif etmək, müxtəlif ölkələrdən olan illüstratorlara öz sənətlərini dünya ekspertlərinə və nəşriyyatlarına çıxarmaq imkanları təklif etməkdir. BIB-nin yarandığı gündən digər mühüm məqsədi uşaqların diqqətini kitab oxumağa cəlb etmək olub.
BIB-nin 55 ildən çox tarixi və keçirdiyi 28 sərgi nümayişi ərzində 110-dan çox ölkədən ümumilikdə 8748 illüstrator tərəfindən 68341 orijinal illüstrasiya və 10 mindən çox kitab təqdim edib.
“Bibiana” isə Uşaqlar üçün Beynəlxalq İncəsənət Evi tərəfindən təşkil edilən ən mühüm tədbirdir. Tədbir UNESCO və Gənclər üçün Kitablar üzrə Beynəlxalq Şuranın (IBBY) himayəsi altında keçirilir ve Slovakiyanın Mədəniyyət Nazirliyi tərəfindən dəstəklənir, əsas təşkilatçı “Bibiana”dır. BIB hər tək ilin payızında Bratislavada keçirilir və uşaq illüstrasiya sənəti üçün ən mühüm dünya tədbirlərindən biridir.
Beynəlxalq BIB Simpoziumu BIB-nin tərkib hissəsi kimi keçirilir. 1985-ci ildə Bratislavada Təsviri İncəsənət və Dizayn Akademiyası (VŠVU) ilə birlikdə gənc illüstratorlar üçün dünya şöhrətli slovak qrafika rəssamı Albin Brunovskinın ilk beynəlxalq BIB - UNESCO seminarı yaradılıb. Bu qeyd olunan tədbirlərdən başqa, BIB tədbirləri ilə yanaşı, xüsusi sərgilər, animasiya işləri və seminarlar da daxil olmaqla, müxtəlif digər fəaliyyətlər də mövcuddur.
İllüstrasiya orijinalları təsviri sənət nəzəriyyəçiləri, illüstratorlar, naşirlər və kitabxanaçılardan ibarət beynəlxalq münsiflər heyəti tərəfindən qiymətləndirilir.
Münsiflər heyəti müxtəlif ölkələrdən, qitələrdən, mədəniyyətlərdən olan 12 nəfərədək üzvdən ibarətdir və 11 nüfuzlu mükafatla, yəni Qran Pri BIB, 5 BIB Qızıl Alma və 5 BIB Plaketi ilə mükafatlandırır.
Münsiflər heyəti həmçinin görkəmli nailiyyətlərə görə naşirə Fəxri Rəy verə bilər. Ən yüksək mükafat olan Qran Pri BIB-ni qazanan illüstrator növbəti BIB-də fərdi sərgi keçirmək imtiyazına malikdir və həmçinin qarşıdan gələn BIB beynəlxalq münsiflər heyətinin üzvü olmaq imkanı qazanır. 1993-cü ildən bəri BIB-nin öz qalibini seçən uşaq münsiflər heyəti də var.
BIB təkcə Bratislavada kitab illüstrasiyalarının rəqabət paradı deyil. Uşaqlar və gənclər üçün illüstrasiya sənəti Slovakiyanın digər şəhərlərində və təbii ki, başqa ölkələrdə də təqdim olunur. BIB Katibliyi müxtəlif beynəlxalq təşkilatlar, Slovakiyanın xaricdəki mədəniyyət müəssisələri ve Slovakiyanın dünya üzrə səfirlikləri ilə əməkdaşlıq edir.
