Misirin paytaxtı Qahirənin şərqində media və ictimaiyyətin diqqətini çəkən Matariya süfrəsi təşkilatından günlər sonra Şeyx Zayed şəhərinin Giza rayonundakı iftar süfrəsi “Ən uzun iftar süfrəsi” yarışına qatılıb.
Hafta.az-ın yazdığına görə, Şeyx Zayed Şəhər Administrasiyası sakinləri bazar ertəsi günü iftara dəvət edərək, "Ən uzun iftar süfrəsi"nin təşkil edildiyini açıqlayıb. Masa təxminən 2 kilometr idi. Oruc tutanlar iftardan 2 saat əvvəl şən ab-hava ilə qarşılanıb. İftar süfrəsi təşkil edən könüllülərdən Mahmud Fəhmi, digər könüllülərlə birlikdə stul və masaları düzüb bəzədiyini söyləyib. O, Ramazan ab-havasına uyğun mahnı və ilahilər oxumaq üçün komanda təşkil etdiyini də bildirib.
İftar süfrəsində “Qonşunuz evinizdir” şüarı yer alıb. Şeyx Zayed Şəhər Administrasiyası bir növ icma həmrəyliyi kimi iştirakçıları iftarlarda görüşməyə dəvət edib. Rəhbərlik məhəllə əhalisini iftarlarda bir araya gətirməyi qarşısına məqsəd qoyub və iftardan sonra uşaqlar üçün əyləncələr təşkil edir.
Tədbirin təşkilatçısı Şeyx Zayed şəhər administrasiyası rəhbərinin müavini Dr. Muna Barakatın sözlərinə görə, belə bir tədbir ilk dəfə Ramazan ayında Şeyx Zayeddə keçirilib: “Bizi məhəllə sakinlərinin sıx iştirakı təəccübləndirdi. Gələn il də bunu təkrarlamağı planlaşdırırıq. Başlanğıcda səhifəmizdə Ramazan süfrəsi tədbirini elan etmişdik və iştirakçıların 2 min nəfərə çatacağını gözləyirdik. Ancaq bu rəqəmin 5 minə çatması bizi təəccübləndirdi. Ən uzun iftar süfrəsi kimi Ginnesin Rekordlar Kitabına düşməyi bacarsaq da, bu tədbiri Matariya süfrəsi ilə rəqabət aparmaq üçün açmağı planlaşdırmırdıq. Biz gələn il də rekordu yeniləməyə çalışacağıq”.
Dehakliya (Şimali Misir) əyalətinin Mansurə şəhəri çərşənbə axşamı "Mansurə xalqı birlikdə iftar edir" şüarı ilə Misir şəhərləri arasında "Ən uzun süfrə" müstəvisində iftar təşkil edərək bu yarışa qatılıb.
Xatırladaq ki, paytaxt Qahirənin şərqində yerləşən Misirin yeni siyasi paytaxtı, 2019-cu ildə Ginnesin Rekordlar Kitabında yarışmağa qatılan "Dünyanın ən uzun iftar süfrəsi" olaraq təyin etdiyi tədbirdə 3 min metri aşan masa qurulmuş və təxminən 7 min adam iştirak etmişdi.
