Çin Böyük Səddinin divarlarının bir hissəsini ekskavatorla zədələyən iki nəfər saxlanılıb.
Hafta.az-ın yazdığına görə, Şansi Mədəni Abidələr Bürosu sosial şəbəkədə bildirib ki, Zheng adlı 38 yaşlı kişi və Vanq adlı 55 yaşlı qadın avqustun sonunda Böyük Səddin bir hissəsindəki boşluğu genişləndirmək üçün ekskavatordan istifadə ediblər. Onlar ekskavatorla divardakı boşluğu genişləndirərək keçid üçün qısa yol açıblar.
Səlahiyyətlilərə görə, şübhəlilər UNESCO-nun Ümumdünya İrs Siyahısına bərpa olunmaz ziyan vurublar.
Min sülaləsi (1368-1644) dövrünə aid olan divar təmir edilə bilməyəcək dərəcədə zədələnib. Avqustun 24-də polis dəymiş ziyanı müəyyən edib və günahkarları Horinger dairəsinə aparan izdən sonra orada sözügedən iki şübhəli şəxsə çatıb.
İki şəxs yaxınlıqdakı tikinti layihəsində işləmək üçün müqavilə bağladıqlarını və divardan keçməyi asanlaşdırmaq üçün ekskavatordan istifadə etdiklərini boyunlarına alıblar. Şübhəlilərin hər ikisinə qarşı mədəni artefaktı məhv etmək ittihamı irəli sürülüb.
Çinin ən məşhur milli görməli yerlərindən biri və məşhur turistik məkan olan Böyük Sədd gözətçi qüllələri ilə ölkənin şimal hissəsində 20 min kilometrdən çox ərazini əhatə edir.
Tikintisinin 2000 il əvvələ aid olduğu güman edilən Böyük Çin Səddi o vaxtdan bəri bir neçə dəfə yenidən tikilib.
“Global Times”ın 2016-cı il hesabatına görə, Minq dövründən qalan divarın yalnız 6259 kilometrinin və ya yalnız 10 faizinin yaxşı qorunduğu təxmin edilir. Çünki tikinti həm təbii, həm də insan faktorları səbəbindən uzun müddətdir ki, aşınır.
Məlumata əsasən, Şansi əyalətində divar xüsusilə 1970-ci illərdə geniş yayılmış kərpic oğurluğuna məruz qalıb, yerli sakinlər kərpiclərdən ev tikmək üçün istifadə ediblər.
