Bakının tarixi mərkəzindəki Qız Qalasının qarşısında xüsusi yoqa sessiyası keçirilib. Tədbir Hindistanın ölkəmizdəki səfirliyinin təşkilatçılığı və “İçərişəhər” Dövlət Tarix-Memarlıq Qoruğu İdarəsinin dəstəyi ilə baş tutub.
Hafta.az-ın yazdığına görə, Hindistanın ölkəmizdəki səfiri Sridharan Madhusudhanan göstərdiyi dəstəyə görə “İçərişəhər” administrasiyasına minnətdarlığını bildirib. O, belə bir tarixi məkanda yoqa və sağlamlıq arasında vəhdəti vurğulayıb.
Tədbirdə əsas iştirakçılar qismində “İçərişəhər” Dövlət Tarix-Memarlıq Qoruğu İdarəsinin Elmi-Mədəni Mərkəzinin direktoru Vüqar Hüseynli və “İçərişəhər” Qoruğunun Kütləvi Tədbirlər Şöbəsinin müdiri Bəyaz Sadıxova iştirak ediblər.
Yoqa seansını “The Art of Living” təşkilatından təcrübəli yoqa mütəxəssisi cənab Kənan Məmmədov aparıb. Onun rəhbərliyi altında iştirakçılar müxtəlif yoqa duruşlarını və nəfəs texnikalarını yerinə yetiriblər.
Belə bir unikal məkanda baş tutmuş bu uğurlu tədbir Bakıda yoqanın artan populyarlığını nümayiş etdirib, eləcə də Hindistanın Azərbaycandakı Səfirliyinin yoqanın faydalarını daha da geniş ictimaiyyətə çatdırmaq üzrə öhdəliyini vurğulayıb.
