Rumıniya son üç gündə ölkənin hava məkanını pozan üçüncü pilotsuz uçuş aparatını F-16 qırıcısı ilə zərərsizləşdirdikdən sonra Rusiyaya qarşı diplomatik və hərbi baxımdan mövqeyini daha da sərtləşdirib.
Hafta.az xəbər verir ki, bu barədə Rumıniya rəsmilərinin açıqlamalarına istinadla yerli media məlumat yayıb. Rumıniyanın Xarici İşlər Nazirliyi Rusiyanın Buxarestdəki səfirini nazirliyə çağıraraq növbəti dəfə rəsmi etirazını çatdırıb. Xarici işlər naziri Oana Tsoyu bildirib ki, Rumıniyanın hava məkanının ardıcıl şəkildə pozulması qəbuledilməzdir və bu cür hərəkətlər NATO ilə Avropa İttifaqının təhlükəsizliyinə qarşı yönəlmiş addımlar kimi qiymətləndirilir.
Nazirin sözlərinə görə, diplomatik etiraz yalnız siyasi bəyanat xarakteri daşımır. Aparılan araşdırmalar başa çatdıqdan sonra əldə olunan nəticələr beynəlxalq tərəfdaşlarla bölüşdürüləcək, Rumıniya bu məsələni NATO və Avropa İttifaqı çərçivəsində də gündəmdə saxlayacaq.
Rumıniyanın müdafiə naziri vəzifəsini icra edən Radu Mirutse deyib ki, pilotsuz uçuş aparatı əvvəlcə ölkənin radar sistemləri tərəfindən Qara dəniz istiqamətində izlənilib. Dron Rumıniyanın ərazi sularına daxil olduqdan 5 dəqiqə sonra Hərbi Hava Qüvvələrinə məxsus F-16 qırıcısı tərəfindən Sulina yaxınlığında təhlükəsiz şəkildə məhv edilib. Müdafiə Nazirliyi əməliyyatın mülki əhali üçün heç bir risk yaratmadan həyata keçirildiyini açıqlayıb.
Prezident Nikuşor Dan isə vurğulayıb ki, bu, artıq təsadüfi hadisə deyil. Onun sözlərinə görə, ardıcıl üç gün ərzində baş verən oxşar insidentlər Rumıniyanın milli təhlükəsizliyi üçün yeni reallıq formalaşdırır. Prezident Rusiyanın hərəkətlərini qəbuledilməz adlandıraraq ölkəsinin hava məkanının qorunması üçün bütün zəruri tədbirlərin görüləcəyini bəyan edib.
Müşahidəçilər vurğulayırlar ki, son hadisələr Rumıniyanın müdafiə siyasətində mühüm dönüş nöqtəsi yaradıb. Əvvəllər sərhədə yaxın ərazilərdə aşkar olunan pilotsuz uçuş aparatları əsasən izlənilir və onların trayektoriyası nəzarətdə saxlanılırdı. İndi isə hərbi komandanlıq hava məkanını pozan istənilən hədəfin dərhal zərərsizləşdirilməsi strategiyasını tətbiq edir. Bu yanaşma ölkədə qəbul edilmiş yeni qanunvericilik dəyişikliklərindən sonra ilk dəfə ardıcıl şəkildə həyata keçirilir.
Hərbi ekspertlərin fikrincə, Rumıniyanın mövqeyinin sərtləşməsi Rusiyanın Ukraynanın Dunay çayı sahilində yerləşən Reni və İzmail limanlarına pilotsuz uçuş aparatları ilə endirdiyi intensiv zərbələrlə birbaşa bağlıdır. Həmin hücumlar zamanı pilotsuz uçuş aparatlarının marşrutları Rumıniya sərhədinə son dərəcə yaxın keçir və bu da NATO-nun şərq cinahında təhlükəsizlik risklərini artırır.
Analitiklər hesab edirlər ki, Buxarest artıq yalnız sərhəd insidentlərinə reaksiya vermir, həm də gələcək oxşar halların qarşısını almağa çalışır. Bu məqsədlə Rumıniya hava müşahidə sistemlərini genişləndirir, F-16 qırıcılarının döyüş növbətçiliyini gücləndirir və NATO müttəfiqləri ilə real vaxt rejimində məlumat mübadiləsini artırır. Bununla yanaşı, Qara dəniz bölgəsində hava patrullarının intensivliyinin də artırıldığı bildirilir.
Son hadisələr NATO daxilində də ciddi müzakirələrə səbəb olub. Alyans rəsmiləri Rumıniyanın hava məkanının etibarlı şəkildə qorunmasının bütün şərq cinahının təhlükəsizliyi üçün vacib olduğunu vurğulayırlar.
Ekspertlər hesab edirlər ki, belə insidentlərin təkrarlanması bölgədə əlavə hava hücumundan müdafiə vasitələrinin və müttəfiq qüvvələrin yerləşdirilməsi ilə nəticələnə bilər.
Qeyd edək ki, Rumıniya hakimiyyətinin məlumatına görə, Ukraynada müharibə başlayandan bəri Rusiya mənşəli pilotsuz uçuş aparatları azı 33 dəfə Rumıniya hava məkanını pozub. Son üç gün ərzində isə üç pilotsuz uçuş aparatı ardıcıl olaraq Rumıniya Hərbi Hava Qüvvələrinə məxsus F-16 qırıcıları tərəfindən zərərsizləşdirilib.
