Səudiyyə Ərəbistanının Mədəniyyət Nazirliyi ilə MBC Group arasında 24 saat müxtəlif proqramlarla Səudiyyə mədəniyyətini təbliğ edəcək mədəniyyət telekanalının yaradılması ilə bağlı müqavilə imzalanıb.
Hafta.az-ın yazdığına görə, müqaviləni Krallığın mədəniyyət naziri şahzadə Bədr bin Fərhanla MBC Group-un sədri Valid bin İbrahim əl-İbrahim imzalayıb.
Sövdələşməyə həmçinin videolar, məqalələr, podkastlar və sənədli filmlər istehsal edəcək rəqəmsal media platformasının yaradılması planları da daxildir.
Şahzadə Bədr bin Fərhan nazirliyin saytına "Səudiyyə mədəniyyəti möhkəm təməl üzərində dayanır, müxtəlif mədəniyyət sahələrində yaradıcı sənaye ilə zəngindir" deyib.
Vəliəhd Şahzadə Məhəmməd bin Salman bin Əbdüləzizin dəstəyi və göstərişləri ilə 2030 hədəfləri çərçivəsində atılan bu addımla Səudiyyə Ərəbistanının mədəniyyət və incəsənət ictimaiyyəti yeni rəqəmsal kanalın gələn ilin sentyabrında açılmasını gözləyir.
Mədəniyyət naziri X-də verdiyi açıqlamada yeni platformada ölkənin irsi, ədəbiyyatı, təsviri incəsənəti, kulinariya sənəti, moda, filmlər, kitablar, teatr, tamaşa sənəti, musiqi, memarlıq və dizayn sahələrinin yer alacağını bildirib.
X-ə verdiyi açıqlamada Səudiyyə Ərəbistanının informasiya naziri Dusari də yeni media platformasını vətəndaşların yaradıcılığı üçün başqa bir pəncərə kimi qiymətləndirib. "Biz media sistemində öz rolumuzu oynamağa davam edəcəyik. Onun uğur və mükəmməlliyini dəstəkləmək üçün bütün istedadlarımızdan istifadə edəcəyik" deyib Dusari.
Səudiyyə Ərəbistanının regional mədəniyyət mərkəzi kimi mövqeyini möhkəmləndirəcək və sentyabrda istifadəyə verəcək yeni kanal MBC peyk paketi və Shahid.net saytı vasitəsilə istifadəyə veriləcək. Bu təşəbbüs həm də sürətli texnoloji tərəqqiləri qəbul etməyə can atan yeni nəslin istəklərinə uyğun gələn “Hədəf 2030”un mədəni dirçəlişinə uyğundur.
